جوڈیشل کمیشن آف پاکستان نے پشاور ہائیکورٹ کے ایڈیشنل ججز کی مستقلی سے متعلق اہم فیصلے کر لیے ہیں۔ چیف جسٹس پاکستان یحییٰ آفریدی کی زیر صدارت ہونے والے جوڈیشل کمیشن کے اجلاس میں متفقہ طور پر پشاور ہائیکورٹ کے 6 ایڈیشنل ججز کو مستقل جج بنانے جبکہ 4 ایڈیشنل ججز کی مدت میں 6 ماہ کی توسیع کی منظوری دی گئی۔
ذرائع کے مطابق جن ایڈیشنل ججز کو مستقل جج بنانے کی منظوری دی گئی ان میں جسٹس صادق علی، جسٹس مدثر امیر، جسٹس محمد طارق آفریدی، جسٹس عبدالفیاض، جسٹس اصلاح الدین اور جسٹس قاضی جواد احسان اللہ شامل ہیں۔
اسی طرح ایڈیشنل جج جسٹس انعام اللہ خان، جسٹس فرح جمشید، جسٹس ثابت اللہ اور جسٹس اورنگزیب کی مدت میں 6 ماہ کی توسیع کی منظوری دی گئی ہے۔
اجلاس میں پشاور ہائیکورٹ کے دیگر ججز کی مستقلی کے معاملات پر بھی غور کیا گیا۔ ذرائع کے مطابق جوڈیشل کمیشن کے اس اجلاس میں پاکستان تحریک انصاف کے ارکان بیرسٹر علی ظفر اور بیرسٹر گوہر شریک نہیں ہوئے جبکہ خیبر پختونخوا کے وزیر قانون آفتاب عالم آفریدی بھی اجلاس میں موجود نہیں تھے۔