اسلام آباد میں بین الاقوامی معیار کے نئے کنونشن سینٹر کی تعمیر کے لیے عملی اقدامات شروع کر دیے گئے ہیں۔ وزیراعظم کی ہدایت پر وفاقی وزیر داخلہ محسن نقوی نے مری روڈ بھارہ کہو بائی پاس کے قریب نئے کنونشن سینٹر کی مجوزہ جگہ کا دورہ کیا اور موقع پر ہی اہم احکامات جاری کیے۔
وفاقی وزیر داخلہ محسن نقوی نے ہدایت کی کہ مجوزہ جگہ پر موجود ہر قسم کے غیر قانونی قبضے فوری طور پر ختم کیے جائیں۔ انہوں نے واضح کیا کہ قابضین کے خلاف بلاامتیاز قانونی کارروائی کی جائے گی اور تمام غیر قانونی تعمیرات کو مسمار کیا جائے گا۔ محسن نقوی کا کہنا تھا کہ قابضین کو کسی قسم کی رعایت یا معاوضہ نہیں دیا جائے گا۔
اس موقع پر گفتگو کرتے ہوئے وزیر داخلہ محسن نقوی نے کہا کہ اسلام آباد میں بین الاقوامی معیار کی سہولیات کی فراہمی حکومت کا عزم ہے۔ انہوں نے بتایا کہ اس منصوبے کی تکمیل سے پاکستان میں ایس سی او سمٹ سمیت دیگر اہم بین الاقوامی کانفرنسز کے انعقاد میں نمایاں سہولت حاصل ہو گی۔
دورے کے موقع پر چیئرمین سی ڈی اے محمد علی رندھاوا، ڈپٹی کمشنر اسلام آباد عرفان میمن اور دیگر اعلیٰ حکام بھی موجود تھے۔