پاکستان نے سعودی عرب سے حاصل کردہ 1.2 ارب ڈالر کی سعودی آئل فیسلٹی (SOF) کی موجودہ مدت مکمل ہونے کے بعد مزید دو سال کے لیے توسیع کی باضابطہ درخواست دے دی ہے۔
اعلیٰ سرکاری ذرائع کے مطابق پاکستان نے جاری بین الاقوامی مالیاتی فنڈ (آئی ایم ایف) پروگرام کی تکمیل تک سعودی آئل فیسلٹی میں توسیع کے لیے سعودی حکام سے رابطہ کیا ہے اور اس ضمن میں نئی درخواست جمع کرا دی گئی ہے۔ ذرائع کا کہنا ہے کہ اس وقت سعودی عرب کی باضابطہ منظوری کا انتظار کیا جا رہا ہے۔
ذرائع کے مطابق سعودی آئل فیسلٹی میں توسیع سے پاکستان کو توانائی درآمدات کے شعبے میں مالی سہولت حاصل رہے گی، جو موجودہ معاشی حالات میں نہایت اہم سمجھی جا رہی ہے۔
دوسری جانب وزارتِ پیٹرولیم اور وزارتِ خزانہ نے متعدد بار رابطے کے باوجود اس معاملے پر کسی قسم کا تبصرہ کرنے سے گریز کیا ہے۔