ایرانی وزیر خارجہ عباس عراقچی نے امریکی صدر ڈونلڈ ٹرمپ کے نام اہم پیغام میں کہا ہے کہ ایران اصولوں پر قائم رہنے والا ملک ہے۔
اپنے بیان میں عباس عراقچی نے کہا کہ ایران مذاکرات کے دوران اپنے مخالفین پر خفیہ حملے نہیں کرتا، تاہم اگر ایران پر کوئی حملہ کیا گیا تو اس کا بھرپور اور سخت جواب دیا جائے گا۔
انہوں نے دعویٰ کیا کہ ایران کو اسرائیل کی جانب سے انفراسٹرکچر پر ممکنہ حملوں کے منصوبوں سے متعلق معلومات حاصل ہیں۔
ایرانی وزیر خارجہ نے خبردار کیا کہ اگر ایران کے انفراسٹرکچر کو نشانہ بنایا گیا تو پھر کسی بھی فریق کو خاطر میں نہیں لایا جائے گا اور سخت ردعمل دیا جائے گا۔
دوسری جانب ایران کے اعلیٰ فوجی ترجمان نے اسرائیل اور امریکا کو سخت انتباہ دیتے ہوئے کہا ہے کہ اب دنیا بھر میں ان کے حکام کے لیے کوئی جگہ محفوظ نہیں رہے گی۔
ایرانی سرکاری ٹی وی کے مطابق ترجمان جنرل ابوالفضل شکارچی نے اپنے بیان میں کہا کہ دستیاب معلومات کی بنیاد پر دنیا کے کسی بھی پارک، تفریحی مقام یا سیاحتی جگہ کو محفوظ نہیں سمجھا جا سکتا۔
انہوں نے مزید کہا کہ ایران کے دشمنوں کو اب عالمی سطح پر عدم تحفظ کی صورتحال کا سامنا کرنا پڑے گا، اور انہیں ہر جگہ خطرات لاحق ہوں گے۔