ملک بھر میں 86 واں یوم پاکستان ملی جوش و جذبے کے ساتھ منایا جا رہا ہے، دن کا آغاز نماز فجر کے بعد ملک کی سلامتی، استحکام اور ترقی کے لیے خصوصی دعاؤں سے ہوا۔
یوم پاکستان کے موقع پر قومی یکجہتی اور شہدا کے درجات کی بلندی کے لیے قرآن خوانی کی گئی، جبکہ وفاقی دارالحکومت اسلام آباد میں 31 اور صوبائی دارالحکومتوں میں 21، 21 توپوں کی سلامی دی گئی۔ اس دوران فضا پاکستان زندہ باد کے نعروں سے گونج اٹھی اور اہم سرکاری عمارتوں پر قومی پرچم لہرایا گیا۔
اس موقع پر قوم نے ملک کی ترقی، استحکام اور خوشحالی کے لیے اتحاد و یکجہتی کا عہد کیا اور اس عزم کا اظہار کیا کہ پاکستان کی ترقی کے لیے مزید محنت اور قربانی کا مظاہرہ کیا جائے گا۔
واضح رہے کہ اسلام آباد میں یوم پاکستان کی مرکزی تقریب منعقد ہونا تھی، تاہم خطے میں کشیدہ صورتحال اور حکومتی کفایت شعاری مہم کے باعث اس تقریب کو منسوخ کر دیا گیا۔