ملک کے بیشتر علاقوں میں آج سے 30 مارچ تک تیز ہواؤں اور گرج چمک کے ساتھ بارش کی پیشگوئی کردی گئی ہے جس کے باعث موسم خوشگوار ہونے کا امکان ہے۔
محکمہ موسمیات کے مطابق مغربی ہواؤں کا نیا سلسلہ ملک میں داخل ہو رہا ہے جس کے زیر اثر مختلف علاقوں میں بارشیں متوقع ہیں۔
کراچی اور حیدرآباد میں 25، 26 اور 28، 29 مارچ کو بارش کا امکان ظاہر کیا گیا ہے جبکہ اندرون سندھ کے علاقوں سکھر، دادو، کشمور، جیکب آباد اور لاڑکانہ میں بھی بارش متوقع ہے۔
محکمہ موسمیات کا مزید کہنا ہے کہ کراچی میں 24 مارچ کی شام سے مغربی ہواؤں کا سلسلہ بلوچستان کے جنوب مغربی علاقوں میں داخل ہوگا جس کے باعث 25 سے 29 مارچ تک شہر میں تیز ہواؤں اور گرج چمک کے ساتھ بارش متوقع ہے۔
محکمہ موسمیات کے مطابق بلوچستان اور خیبر پختونخوا کے مختلف علاقوں میں بھی بارش کا امکان ہے، جبکہ پنجاب اور اسلام آباد میں بھی گرج چمک کے ساتھ بارش متوقع ہے۔اسی طرح گلگت بلتستان اور آزاد کشمیر میں بھی بارشوں کی پیشگوئی کی گئی ہے۔