امریکی میڈیا رپورٹس کے مطابق ایران اور امریکا کے درمیان جاری پسِ پردہ مذاکرات میں اہم پیش رفت سامنے آئی ہے، جبکہ جنگ بندی کے امکانات بھی مضبوط ہوتے دکھائی دے رہے ہیں۔
امریکی خبر رساں ادارے Axios کے مطابق وائٹ ہاؤس نے ثالثوں کے ذریعے موصول ہونے والے ایرانی جواب کو ”حوصلہ افزا“ قرار دیا ہے۔ رپورٹ میں کہا گیا ہے کہ ایران کی نئی تجویز اگرچہ امریکی توقعات کے مکمل مطابق نہیں، تاہم یہ ابتدائی اندازوں سے کہیں بہتر سمجھی جا رہی ہے۔
رپورٹس کے مطابق اس وقت دونوں فریقوں کے درمیان سنجیدہ سطح پر جنگ بندی کے امکانات پر غور جاری ہے، جبکہ ثالثی میں شامل ممالک اور سفارتی حلقے معاہدے کو حتمی شکل دینے کے لیے بھرپور دباؤ ڈال رہے ہیں۔ ذرائع کے مطابق زیر غور تجاویز میں عارضی جنگ بندی اور اس کے بعد مستقل امن معاہدے کی راہ ہموار کرنے کے نکات شامل ہیں۔
امریکی اور علاقائی ذرائع کا کہنا ہے کہ مذاکرات کا مقصد خطے میں کشیدگی کو مزید بڑھنے سے روکنا اور ممکنہ وسیع جنگ کے خطرے کو کم کرنا ہے۔ تاہم ابھی تک کسی حتمی معاہدے کا باضابطہ اعلان سامنے نہیں آیا۔