پاکستان نے لبنان کے خلاف جاری اسرائیلی جارحیت کی شدید ترین الفاظ میں مذمت کرتے ہوئے کہا ہے کہ یہ حملے نہ صرف معصوم انسانی جانوں کے ضیاع بلکہ بنیادی ڈھانچے کی وسیع تباہی کا باعث بن رہے ہیں۔
دفتر خارجہ کے ترجمان کی جانب سے جاری بیان میں کہا گیا ہے کہ اسرائیلی کارروائیاں خطے میں امن و استحکام کے قیام کی عالمی کوششوں کو نقصان پہنچا رہی ہیں اور یہ بین الاقوامی قانون اور بنیادی انسانی اصولوں کی کھلی خلاف ورزی ہیں۔
ترجمان دفتر خارجہ کے مطابق پاکستان نے عالمی برادری پر زور دیا ہے کہ وہ لبنان کے خلاف اسرائیلی جارحیت کو فوری طور پر روکنے کے لیے ٹھوس اور ہنگامی اقدامات کرے۔
بیان میں مزید کہا گیا کہ پاکستان اس مشکل گھڑی میں لبنان کی حکومت اور عوام کے ساتھ مکمل یکجہتی کا اظہار کرتا ہے۔
ترجمان دفتر خارجہ نے بیان میں کہا ہے کہ پاکستان لبنان کی خودمختاری، علاقائی سالمیت، امن اور استحکام کی بھرپور حمایت جاری رکھے گا۔