وزیراعظم شہباز شریف اور لبنان کے وزیراعظم نواف سلام کے درمیان ٹیلیفونک رابطہ ہوا ہے، جس میں لبنانی وزیراعظم نے اپنے ملک اور عوام پر اسرائیلی حملوں کے فوری خاتمے کے لیے پاکستان سے تعاون کی درخواست کی ہے۔
گفتگو کے دوران وزیراعظم شہباز شریف نے لبنان کے خلاف اسرائیلی جارحیت کی شدید مذمت کرتے ہوئے جانی نقصان پر گہرے دکھ کا اظہار کیا اور کہا کہ پاکستان علاقائی امن کے لیے مخلصانہ کوششیں کر رہا ہے، جس کے تحت ایران اور امریکا کے درمیان مذاکرات کا انعقاد کیا جا رہا ہے۔
لبنانی وزیراعظم نے پاکستان کی امن کوششوں کو سراہتے ہوئے اس بات پر زور دیا کہ اس امر کی تصدیق کی جائے کہ جاری جنگ بندی کی کوششوں میں لبنان بھی شامل ہے تاکہ مزید حملوں کو روکا جا سکے۔
یہ رابطہ ایک ایسے وقت میں ہوا ہے جب حالیہ اسرائیلی حملوں میں 200 سے زائد لبنانی شہری جاں بحق ہو چکے ہیں، تاہم امریکا اور اسرائیل کا موقف ہے کہ جنگ بندی لبنان پر لاگو نہیں ہوتی اور حزب اللہ کے خلاف کارروائیاں جاری رہیں گی۔
دوسری جانب ایران نے واضح کیا ہے کہ وہ لبنان کو کسی بھی ممکنہ جنگ بندی کا لازمی حصہ سمجھتا ہے۔ دونوں رہنماؤں نے مستقبل میں بھی باہمی رابطے برقرار رکھنے پر اتفاق کیا ہے۔