ایران کا اعلیٰ سطح کا وفد امریکا کے ساتھ مجوزہ مذاکرات میں شرکت کے لیے وفاقی دارالحکومت پہنچ گیا ہے جہاں اہم سفارتی سرگرمیوں کا آغاز متوقع ہے۔
ترجمان دفتر خارجہ کے مطابق ایرانی وفد کی قیادت محمد باقر قالیباف کر رہے ہیں جبکہ ایرانی وزیر خارجہ عباس عراقچی بھی وفد کے ہمراہ اسلام آباد پہنچے ہیں۔
دفتر خارجہ کے مطابق وفد کا استقبال نائب وزیراعظم و وزیر خارجہ اسحاق ڈار نے کیا جبکہ اسپیکر قومی اسمبلی سردار ایاز صادق بھی اس موقع پر موجود تھے۔ اس کے علاوہ فیلڈ مارشل عاصم منیر اور وفاقی وزیر داخلہ محسن نقوی نے بھی معزز مہمانوں کا خیرمقدم کیا۔
ترجمان کے مطابق اسحاق ڈار نے امید ظاہر کی کہ فریقین تعمیری انداز میں مذاکرات کو آگے بڑھائیں گے جبکہ پاکستان نے تنازع کے پائیدار اور دیرپا حل کے لیے اپنی سہولت کاری جاری رکھنے کے عزم کا اعادہ کیا ہے۔
ذرائع کے مطابق ایرانی وفد میں دیگر اہم شخصیات بھی شامل ہیں جن میں علی اکبر احمدیان، عبدالناصر ہمتی اور محمد باقر ذوالقدر شامل ہیں جو مختلف اہم حکومتی اور دفاعی عہدوں پر فائز ہیں۔
یہ وفد اسلام آباد میں امریکی نمائندوں کے ساتھ جنگ بندی سے متعلق مذاکرات میں حصہ لے گا جسے خطے میں امن کے قیام کے لیے اہم پیش رفت قرار دیا جا رہا ہے۔
یاد رہے کہ اس سے قبل محمد باقر قالیباف نے جنگ بندی کے حوالے سے دو اہم شرائط کا ذکر کیا تھا جن میں ایران کے منجمد اثاثوں کی بحالی اور لبنان میں فوری جنگ بندی شامل ہیں تاہم ان پر تاحال عملدرآمد نہیں ہو سکا ہے۔