امریکی صدر ڈونلڈ ٹرمپ نے وزیراعظم شہباز شریف اور فیلڈ مارشل عاصم منیر کی درخواست پر ایران کے خلاف ممکنہ حملے روکنے اور جنگ بندی میں توسیع کا اعلان کر دیا ہے۔
صدر ٹرمپ نے سوشل میڈیا پر اپنے بیان میں کہا کہ پاکستانی قیادت نے ایران پر حملے سے گریز کی درخواست کی جس کے بعد یہ فیصلہ کیا گیا۔ ان کے مطابق جنگ بندی اس وقت تک برقرار رکھی جائے گی جب تک ایران کی جانب سے متفقہ تجاویز سامنے نہیں آ جاتیں اور مذاکراتی عمل مکمل نہیں ہو جاتا۔
امریکی صدر کا کہنا تھا کہ انہوں نے اپنی افواج کو ہدایت دی ہے کہ وہ ناکہ بندی جاری رکھیں اور ہر قسم کی صورتحال کے لیے تیار رہیں۔
دوسری جانب ایرانی پارلیمنٹ کے اسپیکر کے مشیر مہدی محمدی نے اس اعلان کو مسترد کرتے ہوئے کہا ہے کہ جنگ بندی میں توسیع کی کوئی حیثیت نہیں۔ انہوں نے کہا کہ ایران کے خلاف جاری ناکہ بندی دراصل بمباری کے مترادف ہے اور اس کا جواب فوجی کارروائی کی صورت میں دیا جانا چاہیے۔