امریکی صدر ڈونلڈ ٹرمپ نے کہا ہے کہ آبنائے ہرمز میں بارودی سرنگوں کی صفائی کا عمل جاری ہے اور اس سلسلے میں امریکی بحریہ متحرک ہے۔
سماجی رابطے کی ویب سائٹ X (سابقہ ٹوئٹر) پر جاری اپنے بیان میں صدر ٹرمپ کا کہنا تھا کہ امریکی مائن سویپرز اس وقت آبنائے ہرمز میں بارودی سرنگوں کو صاف کرنے میں مصروف ہیں۔
انہوں نے خبردار کیا کہ جو بھی کشتی بارودی سرنگیں بچھانے کی کوشش کرے گی، اسے فوری طور پر تباہ کر دیا جائے گا۔
صدر ٹرمپ کے مطابق انہوں نے آبنائے ہرمز میں ایرانی کشتیوں پر حملوں کا حکم بھی دے دیا ہے۔ ان کا کہنا تھا کہ ایرانی کشتیاں اس اہم گزرگاہ میں بارودی سرنگیں بچھا رہی ہیں، جس کے جواب میں اب تک ایران کے 159 بحری جہازوں کو سمندر میں غرق کیا جا چکا ہے۔
تاہم ان دعوؤں کی آزاد ذرائع سے تصدیق نہیں ہو سکی، جبکہ ایران کی جانب سے اس بیان پر تاحال کوئی باضابطہ ردعمل سامنے نہیں آیا ہے۔
قبل ازیں امریکی محکمہ جنگ (پینٹاگون) نے کہا ہے کہ امریکی افواج نے بحرِ ہند میں ایک ایسے جہاز کے خلاف کارروائی کی ہے جو مبینہ طور پر ایران کی معاونت کر رہا تھا۔
پینٹاگون کی جانب سے سماجی رابطے کے پلیٹ فارم X (سابقہ ٹوئٹر) پر جاری بیان میں کہا گیا کہ گزشتہ رات امریکی افواج نے بغیر رجسٹری اور پابندیوں کا شکار آئل ٹینکر M/T Majestic X کے خلاف آپریشن کیا۔ بیان کے مطابق یہ جہاز ایرانی تیل لے جا رہا تھا۔
امریکی حکام کا کہنا ہے کہ یہ کارروائی بین الاقوامی پابندیوں کے نفاذ کے سلسلے میں کی گئی، تاہم اس آپریشن کی مزید تفصیلات فوری طور پر جاری نہیں کی گئیں۔
دوسری جانب ایران کی طرف سے اس واقعے پر تاحال کوئی باضابطہ ردعمل سامنے نہیں آیا۔