صومالیہ کے قریب بحری قزاقوں کی جانب سے آئل ٹینکر پر حملے اور اسے یرغمال بنائے جانے کے واقعے پر تین دن بعد میڈیا رپورٹس سامنے آنے پر وفاقی وزارت بحری امور نے نوٹس لے لیا ہے۔
وفاقی وزیر بحری امور جنید انوار چوہدری نے واقعے کی تفصیلی رپورٹ طلب کرتے ہوئے متعلقہ اداروں کو 11 رکنی پاکستانی عملے کی بحفاظت بازیابی کے لیے ریسکیو آپریشن مؤثر بنانے کی ہدایت کردی ہے۔
وزیر بحری امور کا کہنا ہے کہ وزارت اور متعلقہ حکام مسلسل رابطے میں ہیں جبکہ عملے کی رہائی کے لیے وزارت خارجہ سے فوری سفارتی رابطوں کی درخواست بھی کردی گئی ہے تاکہ صومالیہ کی حکومت کے تعاون سے پاکستانی شہریوں کو بازیاب کرایا جاسکے۔
اس وقت سمندر میں محصور پاکستانیوں کو بحفاظت نکالنے کے لیے ریسکیو کوششیں شروع کردی گئی ہیں۔