حکومت نے پیٹرولیم مصنوعات کی قیمتوں میں ایک بار پھر اضافہ کر دیا ہے اور اس حوالے سے پیٹرولیم ڈویژن کی جانب سے باضابطہ نوٹیفکیشن بھی جاری کر دیا گیا ہے۔
جاری اعلامیے کے مطابق پیٹرول کی قیمت میں فی لیٹر 6 روپے 51 پیسے کا اضافہ کیا گیا ہے، جس کے بعد نئی قیمت 399 روپے 86 پیسے فی لیٹر مقرر کر دی گئی ہے۔ اسی طرح ہائی اسپیڈ ڈیزل کی قیمت میں بھی نمایاں اضافہ کرتے ہوئے 19 روپے 39 پیسے بڑھا دیے گئے ہیں، جس کے بعد ڈیزل کی نئی قیمت 399 روپے 58 پیسے فی لیٹر ہو گئی ہے۔
نوٹیفکیشن میں بتایا گیا ہے کہ ان نئی قیمتوں کا اطلاق آج رات 12 بجے سے ہو جائے گا۔
مزید تفصیلات کے مطابق پیٹرول پر عائد لیوی میں فی لیٹر 3 روپے 88 پیسے کی کمی کی گئی ہے، جبکہ ڈیزل پر فی لیٹر 28 روپے 69 پیسے لیوی نافذ کر دی گئی ہے، جو اس سے پہلے صفر تھی۔
ذرائع کا کہنا ہے کہ یکم مئی کی سرکاری تعطیل کے باعث قیمتوں میں رد و بدل کا اعلان معمول سے پہلے، آج ہی کر دیا گیا ہے۔