آئندہ دو روز تک سندھ کے بالائی اور وسطی اضلاع میں ہیٹ ویو کا سلسلہ جاری رہے گا

کراچی میں آج مطلع جزوی طور پر ابر آلود ہے اور سمندری ہوائیں چل رہی ہیں، تاہم موسم گرم اور مرطوب برقرار ہے۔

محکمہ موسمیات کے مطابق آج صبح شہر کا کم سے کم درجہ حرارت 28 ڈگری سینٹی گریڈ ریکارڈ کیا گیا جبکہ اس وقت درجہ حرارت 34 ڈگری سینٹی گریڈ تک پہنچ چکا ہے۔

ہوا میں نمی کا تناسب 40 فیصد ہونے کی وجہ سے گرمی کی شدت 39 ڈگری تک محسوس کی جا رہی ہے۔ اس وقت جنوب مغربی سمت سے 22 کلو میٹر فی گھنٹہ کی رفتار سے ہوائیں چل رہی ہیں جبکہ آج زیادہ سے زیادہ درجہ حرارت 36 ڈگری سینٹی گریڈ تک رہنے کا امکان ہے۔

ماہرین کا کہنا ہے کہ فضا میں نمی کی وجہ سے گرمی کی اصل شدت زیادہ محسوس ہو رہی ہے۔ دوسری جانب محکمہ موسمیات نے خبردار کیا ہے کہ آئندہ دو روز تک سندھ کے بالائی اور وسطی اضلاع میں ہیٹ ویو کا سلسلہ جاری رہے گا۔