سندھ کے ضلع سانگھڑ سے تیل و گیس کے شعبے میں ایک اور بڑی کامیابی سامنے آئی ہے جہاں چک 63 لیز کے کنویں سے تیل اور گیس کی باقاعدہ پیداوار شروع ہو گئی ہے۔ اس پیشرفت سے متعلق او جی ڈی سی ایل نے پاکستان اسٹاک ایکسچینج کو باضابطہ طور پر آگاہ کر دیا۔
او جی ڈی سی ایل کے مطابق کنویں سے یومیہ ایک کروڑ اسٹینڈرڈ کیوبک فٹ (10 ایم ایم ایس سی ایف ڈی) گیس اور 600 بیرل خام تیل حاصل ہو رہا ہے۔ منصوبے میں او جی ڈی سی ایل کا 62.5 فیصد، جی ایچ پی ایل کا 22.5 فیصد جبکہ او پی ایل کا 15 فیصد حصہ ہے۔
یہ سانگھڑ میں حالیہ دنوں کی دوسری بڑی کامیابی ہے، اس سے قبل بوبی ڈیپ ون کنویں سے بھی یومیہ 2 ہزار بیرل خام تیل کی پیداوار شروع ہوئی تھی۔ ماہرین کے مطابق نئی پیداوار سے ملکی توانائی کے ذخائر میں اضافہ، درآمدی ایندھن پر انحصار میں کمی اور قیمتی زرمبادلہ کی بچت میں مدد ملے گی۔