شہر قائد میں آٹے کی قیمتوں میں اضافہ کردیا گیا ہے جس کا باقاعدہ نوٹیفکیشن بھی جاری کردیا گیا ہے۔
نوٹیفکیشن کے مطابق 12 مئی کے مقابلے میں 9 جولائی کو آٹے کے تمام نرخوں میں اضافہ کیا گیا ہے، جس کے بعد ریگولر آٹے کی ہول سیل قیمت 110 روپے سے بڑھا کر 122 روپے فی کلو جبکہ ریٹیل قیمت 113 روپے سے بڑھا کر 125 روپے فی کلو مقرر کی گئی ہے۔
اسی طرح فائن آٹے کی ہول سیل قیمت 118 روپے سے بڑھ کر 132 روپے اور ریٹیل قیمت 121 روپے سے بڑھ کر 135 روپے فی کلو کردی گئی ہے، تاہم چکی کے آٹے کی ریٹیل قیمت 145 روپے فی کلو پر برقرار رکھی گئی ہے۔
کمشنر کراچی نے تمام دکانداروں کو سرکاری نرخ نامہ نمایاں جگہ پر آویزاں کرنے کی ہدایت کرتے ہوئے وارننگ دی ہے کہ سرکاری نرخوں کی خلاف ورزی کرنے والوں کے خلاف سخت قانونی کارروائی کی جائے گی۔
یاد رہے کہ گذشتہ روز وزیر اعلیٰ سندھ کی زیر صدارت ہونے والے اجلاس میں گندم کے ذخیرہ اندوزوں کے خلاف سخت کارروائی کا فیصلہ کیا گیا تھا۔