ایم کیو ایم پاکستان کے رہنما اور وفاقی وزیر صحت مصطفیٰ کمال نے اعلان کیا ہے کہ پارلیمنٹ اور آئینی فورمز پر آواز اٹھانے کے بعد اب ان کی جماعت آئین اور قانون کے دائرے میں رہتے ہوئے سڑکوں پر بھی عوامی جدوجہد کرے گی تاکہ اختیارات کو نچلی سطح تک منتقل کیا جا سکے۔
کراچی میں پارٹی رہنماؤں کے ہمراہ پریس کانفرنس کرتے ہوئے مصطفیٰ کمال نے سندھ حکومت اور پاکستان پیپلز پارٹی کو شدید تنقید کا نشانہ بنایا۔ ان کا کہنا تھا کہ سندھ حکومت کراچی کو ملک کی ترقی میں اپنا مکمل کردار ادا کرنے نہیں دے رہی، جبکہ لاہور ترقی کی دوڑ میں کراچی سے کئی دہائیاں آگے نکل چکا ہے۔
انہوں نے کہا کہ دنیا جدید سہولیات کی جانب بڑھ رہی ہے، مگر سندھ میں آج بھی بچے کھلے گٹروں میں گر کر جان سے ہاتھ دھو بیٹھتے ہیں دیگر شہروں میں ایئر ایمبولینس متعارف کرائی جا رہی ہیں جبکہ سندھ میں سائیکل ایمبولینس جیسے منصوبے پیش کیے جا رہے ہیں، اور صوبے میں کتے کے کاٹنے سے بچوں کی اموات تشویشناک حد تک زیادہ ہیں۔
مصطفیٰ کمال نے کہا کہ اگر موجودہ نظام میں بہتری آنی ہوتی تو گزشتہ 18 برس میں آ چکی ہوتی۔ ان کے مطابق ایم کیو ایم پاکستان نے پارلیمنٹ میں آئینی ترمیم بھی پیش کی، لیکن اس پر عملدرآمد نہ ہونے کے بعد جماعت نے عوامی رابطہ مہم شروع کرنے کا فیصلہ کیا ہے۔
انہوں نے کہا کہ اٹھارویں ترمیم اپنی اصل روح کے مطابق نافذ نہیں ہوئی جبکہ انتظامی بنیادوں پر نئے صوبوں کا قیام اور اختیارات کی نچلی سطح تک منتقلی وقت کی اہم ضرورت بن چکی ہے۔
وفاقی وزیر صحت نے دعویٰ کیا کہ سندھ میں دو کروڑ 60 لاکھ بچے اسکولوں سے باہر ہیں اور کئی سرکاری اسکولوں میں بچیوں کے لیے بنیادی سہولتیں، حتیٰ کہ واش روم بھی موجود نہیں۔
کراچی کے مالی کردار پر بات کرتے ہوئے مصطفیٰ کمال نے کہا کہ شہر پاکستان کی مجموعی آمدنی کا 50 فیصد سے زائد اور سندھ کی آمدنی کا 95 فیصد سے زیادہ فراہم کرتا ہے، لیکن اس کے باوجود ترقیاتی فنڈز میں کراچی کو اس کا جائز حصہ نہیں دیا جا رہا۔ ان کے مطابق گزشتہ 18 سال میں 22 ہزار ارب روپے میں سے کراچی کو صرف 680 ارب روپے ملے، جبکہ اگر پرانا مالیاتی فارمولہ برقرار رہتا تو شہر کو اب تک 2 ہزار ارب روپے سے زائد مل چکے ہوتے۔
انہوں نے کہا کہ ایم کیو ایم پاکستان اپنے مؤقف اور اعداد و شمار کے ساتھ یہ معاملہ عوام کے سامنے رکھے گی اور آئینی و جمہوری انداز میں اپنی جدوجہد جاری رکھے گی۔