بنگلا دیش نے اتوار کو آسٹریلیا کو ڈارون میں کھیلے گئے پہلے ٹیسٹ میں نو وکٹوں سے شکست دے کر کرکٹ کی اپنی سب سے بڑی فتح حاصل کرلی۔
یہ پہلا موقع ہے کہ بنگلا دیش نے آسٹریلیا میں کوئی ٹیسٹ میچ جیتا ہے، جہاں وہ 2003 کے بعد پہلی بار ٹیسٹ سیریز کھیل رہے تھے۔
یہ تاریخی کامیابی چوتھے دن اس وقت حاصل ہوئی جب آسٹریلوی ٹیم اپنی دوسری اننگز میں 284 رنز پر آؤٹ ہوگئی، جس کے بعد مہمان ٹیم کو جیت کے لیے صرف 56 رنز کا ہدف ملا۔
بنگلا دیش کی پہلی اننگز میں سنچری بنانے والے تنزید حسن دوسری اننگز کے دوسرے ہی اوور میں جوش ہیزل ووڈ کی گیند پر بغیر کوئی رن بنائے آؤٹ ہو گئے، جس کے بعد سابق کپتان مومن الحق (30 ناٹ آؤٹ) اور شادمان اسلام (25 ناٹ آؤٹ) نے ٹیم کو فتح سے ہمکنار کیا۔ ہیزل ووڈ نے بنگلا دیش کی پہلی اننگز کے مجموعی اسکور 426 رنز کے جواب میں 89 رنز دے کر 6 وکٹیں حاصل کی تھیں اور وہ آسٹریلیا کے نمایاں کھلاڑیوں میں سے ایک رہے۔
آسٹریلیا کے دوسرے نمایاں کھلاڑی کیمرون گرین تھے، جنہوں نے اتوار کے دوسرے سیشن میں سخت محنت کے بعد سنچری بنائی۔ وہ فاسٹ باؤلر حسن محمود کی گیند پر 201 گیندوں پر 104 رنز بنا کر آؤٹ ہوئے۔
حسن محمود، جنہوں نے پہلی اننگز میں 55 رنز دے کر 6 وکٹیں لی تھیں، دوسری اننگز میں 56 رنز کے عوض 3 وکٹوں کے ساتھ نمایاں رہے۔ جبکہ آف اسپنر مہدی حسن معراج نے 66 رنز دے کر 5 وکٹیں حاصل کیں۔
معراج نے اتوار کو لنچ سے قبل آسٹریلیا کی گرنے والی تینوں وکٹیں حاصل کیں، جن میں الیکس کیری، بو ویبسٹر اور کپتان پیٹ کمنز شامل تھے۔
اس ٹیسٹ سے قبل بنگلا دیش نے آسٹریلیا کے خلاف صرف ایک ٹیسٹ میچ جیتا تھا، جو 2017 میں ان کی اپنی سرزمین پر ہوا تھا۔