نیشنل چیمپئنز کپ کے فائنل سے قبل پاکستان گولڈ اور پاکستان گرینز کے کپتانوں شاہین شاہ آفریدی اور شاداب خان کا ٹرافی کے ساتھ فوٹو شوٹ مکمل کرلیا گیا ہے، جس کے بعد دونوں ٹیمیں منگل کی دوپہر تین بجے ملتان کرکٹ اسٹیڈیم میں ٹائٹل کے حصول کے لیے آمنے سامنے ہوں گی۔
ٹورنامنٹ میں پاکستان گرینز نے شاندار کارکردگی کا مظاہرہ کرتے ہوئے اپنے تمام تینوں میچز میں فتح حاصل کی ہے، جبکہ پاکستان گولڈ تین میں سے صرف ایک میچ ہی جیت سکی ہے۔ فائنل کی فاتح ٹیم کو 50 لاکھ روپے اور رنرز اپ کو 25 لاکھ روپے کی انعامی رقم دی جائے گی۔
فائنل سے قبل گفتگو کرتے ہوئے پاکستان گولڈ کے کپتان شاہین شاہ آفریدی کا کہنا تھا کہ پہلے دو میچز ان کے حق میں نہیں رہے لیکن تیسرے میچ میں ٹیم نے بہترین کھیل کا مظاہرہ کیا۔ انہوں نے اعتراف کیا کہ گرینز کی ٹیم اس وقت اچھا کھیل رہی ہے جس کی وجہ سے فائنل کا معرکہ انتہائی دلچسپ ہوگا۔
دوسری جانب پاکستان گرینز کے کپتان شاداب خان نے پوری ٹیم کے بہترین مائنڈ سیٹ اور کارکردگی کی تعریف کرتے ہوئے کہا کہ فائنل کے اہم مقابلے میں پاکستان گولڈ جیسی ٹیم انتہائی خطرناک ثابت ہوسکتی ہے۔