جوان بیٹسمینوں شمل حسین اور سعد خان نے شاندار سینچریاں اسکور کیں جبکہ فاسٹ باؤلر شاہین شاہ آفریدی نے سات وکٹیں حاصل کر کے ملتان میں منگل کی شب پاکستان گولڈ کو 'نیشنل چیمپئنز کپ 2026-27' کا ٹائٹل دلا دیا۔
پاکستان گولڈ ٹیم کی کپتانی کرنے والے شاہین نے ہاٹ ٹرک سمیت 36 رنز کے عوض سات وکٹیں حاصل کیں، جس کی بدولت پاکستان گرینز 341 رنز کے بڑے ہدف کا تعاقب کرنے میں ناکام رہی اور 101 رنز سے میچ ہار گئی۔
دونوں بائیں ہاتھ کے بلے بازوں، شمل حسین اور سعد خان نے شاندار سینچریاں بنائیں اور 137 رنز کی شراکت داری قائم کی۔
جواب میں، گرینز کی ٹیم 20.4 اوورز میں 143-1 پر مضبوط پوزیشن میں تھی، لیکن اس کے بعد ان کا بیٹنگ آرڈر بری طرح ڈگمگا گیا اور اس نے محض 96 رنز کے اندر 9 وکٹیں گنوا دیں۔ ان میں سے سات وکٹیں شاہین نے حاصل کیں اور ہاٹ ٹرک کے ساتھ میچ کا اختتام کیا۔ 8.3 اوورز میں شاہین کے 36 رنز دے کر 7 وکٹ حاصل کرنا لسٹ اے کرکٹ میں ان کی بہترین کارکردگی ہے اور اس فارمیٹ میں پانچ یا اس سے زیادہ وکٹیں لینے کا ان کا چوتھا موقع ہے۔
انہوں نے پاکستانی سرزمین پر 19ویں لسٹ اے ہاٹ ٹرک کا اعزاز بھی اپنے نام کیا، ساتھ ہی یہ پاکستان میں لسٹ اے کی نویں بہترین باؤلنگ کارکردگی بھی ہے۔
گرینز نے تیز شروعات کی اور 53 رنز بنائے جس کے بعد فخر زمان ایک بڑا شاٹ کھیلنے کی کوشش میں آف اسپنر مبصر خان کا شکار بنے، انہوں نے 28 گیندوں پر 31 رنز بنائے۔
اس کے بعد سعد بیگ (67 رنز، 51 گیندیں، 9 چوکے، 2 چھکے) اور عمیر بن یوسف (44 رنز، 50 گیندیں، 2 چوکے، 2 چھکے) نے 90 رنز کی تیز رفتار شراکت قائم کر کے اننگز کو سنبھالا، جس سے یوں لگا کہ میچ گولڈ کے ہاتھ سے نکل رہا ہے، لیکن انہوں نے رضا اللہ کی باؤلنگ سے واپسی کی جنہوں نے عمیر بن یوسف کو آؤٹ کیا۔
اس سے قبل، شمل نے اپنی تیسری لسٹ اے سینچری بنائی جبکہ سعد نے اس فارمیٹ میں اپنی دوسری سینچری اسکور کی اور اپنی بیٹنگ کا شاندار مظاہرہ کیا۔ دونوں بیٹسمین 17ویں اوور میں کریز پر اکٹھے ہوئے اور 34ویں اوور میں جدا ہوئے۔ شمل نے اس سے قبل محمد اخلاق (31 رنز، 44 گیندیں، 4 چوکے) کے ساتھ 78 رنز کی اوپننگ شراکت داری کی تھی، جبکہ کامران غلام جلدی آؤٹ ہو گئے تھے۔
مختصر اسکور:
فائنل – پاکستان گولڈ نے ملتان کرکٹ اسٹیڈیم میں پاکستان گرینز کو 101 رنز سے ہرا دیا
پاکستان گولڈ: 340 رنز پر تمام کھلاڑی آؤٹ، 50 اوورز (سعد خان 112، شمل حسین 111، محمد اخلاق 31، عبدالصمد 25، مبصر خان 21؛ فہیم اشرف 2-40، شاداب خان 2-45، نسیم شاہ 2-59)
پاکستان گرینز: 239 رنز پر تمام کھلاڑی آؤٹ، 37.3 اوورز (سعد بیگ 67، عمیر بن یوسف 44، فہیم اشرف 38 ناٹ آؤٹ، نسیم شاہ 31، فخر زمان 31؛ شاہین شاہ آفریدی 7-36)