کراچی میٹروپولیٹن کارپوریشن (کے ایم سی) نے سرکاری گاڑیوں کے استعمال اور فیول پر عائد تمام پابندیاں ختم کرنے کا اعلان کردیا ہے، جس کے تحت 60 فیصد گاڑیوں کو گراؤنڈ کرنے کا سابقہ فیصلہ بھی واپس لے لیا گیا ہے۔
کے ایم سی کے فنانشل ایڈوائزر گلزار علی کے دستخط سے جاری باضابطہ نوٹیفکیشن کے مطابق یکم ستمبر سے تمام گاڑیوں کی آمدورفت اور فیول کی فراہمی معمول کے مطابق بحال ہوجائے گی۔
واضح رہے کہ رواں سال مارچ میں ایندھن کے شدید بحران، بچت اور کفایت شعاری کی پالیسی کے تحت 60 فیصد سرکاری گاڑیوں کے ساتھ ساتھ گریڈ 17 کے افسران کے استعمال میں موجود گاڑیوں کو گراؤنڈ کر کے ایندھن کی فراہمی پر پابندیاں عائد کی گئی تھیں، جو اب مکمل طور پر اٹھالی گئی ہیں۔