وفاقی وزیر داخلہ محسن نقوی نے کہا ہے کہ ایران سے مذاکرات میں اہم پیشرفت ہوئی ہے جس سے خطے میں دیرپا امن کی راہ ہموار ہونے کی امید ہے۔
اپنے بیان میں محسن نقوی نے کہا کہ ایران میں ہونے والی ملاقات میں اسلام آباد مفاہمتی یادداشت کی بحالی اور تنازع کے جامع حل کے لیے اقدامات پر غور کیا گیا۔
انہوں نے بتایا کہ فیلڈ مارشل عاصم منیر اور ایرانی صدر کے درمیان انتہائی مثبت اور نتیجہ خیز ملاقات ہوئی جس میں ایران، امریکا تنازع اور مشرق وسطیٰ کی مجموعی صورتحال پر تفصیلی تبادلہ خیال کیا گیا۔
وفاقی وزیر داخلہ کے مطابق ملاقات انتہائی مثبت ماحول میں اختتام پذیر ہوئی، جس دوران ایرانی صدر نے اپنی حکومت کا مؤقف اور تحفظات کھل کر بیان کیے۔ محسن نقوی نے کہا کہ مذاکرات میں اہم پیشرفت ہوئی ہے، جس سے خطے میں دیرپا امن کے قیام کی راہ ہموار ہونے کی امید ہے۔