پاکستان نے توانائی کے تحفظ کو مزید مضبوط بنانے کے لیے اسٹریٹجک پٹرولیم ذخائر کے قیام کی جانب اہم پیش رفت کی ہے عالمی توانائی مشاورتی ادارے وُڈ میکنزی کو فیزیبلٹی اسٹڈی کا ٹھیکا دے دیا گیا۔
اس منصوبے کے تحت پاکستان میں اسٹریٹجک پٹرولیم ذخائر کے قیام کے لیے باقاعدہ فیزیبلٹی اسٹڈی کا آغاز کردیا گیا ہے جبکہ عالمی ادارہ وُڈ میکنزی منصوبے کی قیادت کرے گا۔
منصوبے کے آغاز کے لیے منعقدہ اجلاس کی صدارت وفاقی وزیر پیٹرولیم علی پرویز ملک نے کی۔ اجلاس میں فیزیبلٹی اسٹڈی کے دائرہ کار، مدتِ تکمیل اور مجوزہ ڈھانچے کا جائزہ لیا گیا۔
اس موقع پر وفاقی وزیر علی پرویز ملک نے کہا کہ توانائی کا تحفظ قومی سلامتی سے جڑا ہوا ہے اور اسٹریٹجک پٹرولیم ذخائر کا قیام ملک کے توانائی کے تحفظ کو مزید مضبوط بنانے میں اہم کردار ادا کرے گا۔
حکام کے مطابق وُڈ میکنزی کو مسابقتی ٹینڈر کے عمل کے ذریعے منتخب کیا گیا جس میں مجموعی طور پر چار بولیاں موصول ہوئی تھیں۔