چار سال بعد اللہ نے مجھے بیٹا دیا تھا، لیکن جب آگ لگی تو انتظامیہ کا کوئی بندہ نظر نہیں آیا۔ نرسری کے تالے توڑنے کے لیے بھی کوئی موجود نہیں تھا۔ اندر میرا بیٹا تھا، میں نے خود تالہ توڑا اور اندر داخل ہوا۔ آگ نے مجھے اٹھا کر باہر پھینک دیا، لیکن میں نے اپنے ہاتھوں سے چار سے پانچ جلے ہوئے بچوں کو باہر نکالا۔
پمز اسپتال کی نرسری میں آتشزدگی کے دلخراش واقعے کے بعد ایک متاثرہ والد نے انتظامیہ کی مبینہ غفلت پر سوالات اٹھاتے ہوئے بتایا کہ اس کا بیٹا کئی برس کی دعاؤں کے بعد پیدا ہوا تھا، مگر حادثے نے اس کی دنیا ہی اجاڑ دی۔ والد کے مطابق آگ کے وقت نرسری کو کھولنے اور بچوں کو بچانے کے لیے فوری انتظامات نظر نہیں آئے، جبکہ اسے خود جان خطرے میں ڈال کر اندر جانا پڑا۔