سابق تیز گیند باز شعیب اختر نے دورۂ انگلینڈ میں پاکستان کرکٹ ٹیم کی ناقص کارکردگی اور کمزور قیادت پر کپتان بابر اعظم کو شدید تنقید کا نشانہ بناتے ہوئے کہا ہے کہ وہ بحیثیت کپتان ذمہ داریاں پوری کرنے اور بروقت فیصلے کرنے میں ناکام رہے ہیں۔
'راولپنڈی ایکسپریس' کے نام سے معروف سابق اسپیڈسٹر نے کہا کہ بابر کی شخصیت کا عکس ان کی کپتانی اور فیصلے کرنے کی صلاحیت میں صاف دکھائی دیتا ہے، جبکہ پاکستان کرکٹ کے موجودہ نظام پر کی گئی سرمایہ کاری اور اعتماد مکمل طور پر ناکام ہوچکا ہے۔
دوسری جانب تیسرے ٹیسٹ سے قبل پریس کانفرنس کرتے ہوئے بابر اعظم نے اعتراف کیا کہ انگلینڈ کے خلاف دوسرے ٹیسٹ میں شکست کے بعد سات کھلاڑیوں کی تبدیلی اور ہیڈ کوچ و بولنگ کوچ کو ہٹانے کے بورڈ کے فیصلے میں ان کی کوئی مشاورت شامل نہیں تھی اور انہیں اس کا علم بعد میں ہوا۔