لاہور الیکٹرک سپلائی کمپنی (لیسکو) نے بجلی چوری اور میٹر میں ٹمپرنگ کرنے والے صارفین سے اے ایم آئی اسمارٹ سنگل فیز میٹر کی قیمت وصول کرنے کا فیصلہ کر لیا ہے جس کے تحت ایسے صارفین کو میٹر کی تبدیلی کے لیے 14 ہزار 400 روپے کا ڈیمانڈ نوٹس ادا کرنا ہوگا۔
لیسکو کے مطابق بجلی چوری میں ملوث صارفین کے میٹر میں ٹمپرنگ یا بجلی چوری کے لیے ردوبدل ثابت ہونے پر اب روایتی اسٹیٹک میٹر کے بجائے اے ایم آئی اسمارٹ میٹر نصب کیا جائے گا جس کی قیمت صارفین سے وصول کی جائے گی۔
اس سے قبل میٹر کی تبدیلی کی صورت میں صارفین کو اسٹیٹک میٹر کی مد میں 5 ہزار 500 روپے کا ڈیمانڈ نوٹس جاری کیا جاتا تھا تاہم کمپنی نے اب اس کی جگہ اے ایم آئی اسمارٹ سنگل فیز میٹر کی قیمت وصول کرنے کا طریقہ کار اختیار کر لیا ہے۔
لیسکو کے اس اقدام کے تحت میٹر میں ٹمپرنگ یا بجلی چوری کے لیے ہیر پھیر کرنے والے صارفین کو پہلے کے مقابلے میں زیادہ رقم ادا کرنا پڑے گی۔