وزیر دفاع خواجہ محمد آصف نے بیرون ملک مقیم یوٹیوبرز کو پاکستان تحریک انصاف کا سب سے بڑا دشمن قرار دیتے ہوئے کہا کہ یہ افراد محفوظ مقامات پر بیٹھ کر ڈالر کما رہے ہیں جبکہ ان کی پوسٹس کے منفی اثرات کی قیمت پاکستان میں پی ٹی آئی کو ادا کرنا پڑ رہی ہے۔
سماجی رابطے کی ویب سائٹ ایکس پر اپنے بیان میں خواجہ آصف نے کہا کہ بیرون ملک بیٹھے یوٹیوبرز پی ٹی آئی کی حمایت کے دعوے کرتے ہیں لیکن اسی جماعت کی مشکلات اور آزمائشوں کو اپنے مالی فائدے کے لیے استعمال کر رہے ہیں۔
وزیر دفاع کا کہنا تھا کہ ماضی میں پی ٹی آئی کی حکومت کے دوران بھی ان یوٹیوبرز کی آمدن جاری تھی اور اب جب جماعت اقتدار میں نہیں ہے، تب بھی ان کی جیبیں بھر رہی ہیں۔ انہوں نے کہا کہ ان یوٹیوبرز نے پوری جماعت کو نقصان پہنچایا ہے۔
خواجہ آصف نے اپنے بیان میں اس صورت حال پر افسوس کا اظہار کرتے ہوئے کہا کہ انہوں نے پہلے کبھی ایسا نہیں دیکھا کہ کوئی شخص کسی کی حمایت کا دعویٰ کرے اور پھر اسی کی مشکلات کو اپنی کمائی کا ذریعہ بنا لے۔