وزارت مذہبی امور نے ایران کے راستے زمینی سفر کرکے عراق جانے والے پاکستانی زائرین کو اہم سفری ہدایات جاری کرتے ہوئے خبردار کیا ہے کہ ایران اور عراق کے درمیان الشیب بارڈر 21 اکتوبر سے بند ہے، جس کے باعث دونوں ممالک کے درمیان مسافروں کی آمدورفت معطل ہے۔
ترجمان وزارت مذہبی امور کے مطابق الشیب بارڈر زائرین کے لیے ایران سے عراق جانے کا واحد زمینی راستہ ہے، جو تاحکم ثانی بند رہے گا۔ بارڈر کی بندش کے باعث مسافروں، گاڑیوں اور تجارتی سامان کی نقل و حرکت بھی معطل ہے، جبکہ پاکستانی زائرین فی الحال متبادل زمینی راستہ استعمال کرکے عراق نہیں جا سکتے۔
ترجمان کے مطابق ایران میں موجود پاکستانی زائرین بغداد اور نجف کے بین الاقوامی ہوائی اڈوں کے ذریعے عراق جا سکتے ہیں۔ زائرین کو ہدایت کی گئی ہے کہ ایران کے راستے عراق روانگی سے قبل نئی سفری ہدایات اور تازہ ترین صورتحال سے ضرور آگاہی حاصل کریں۔
وزارت مذہبی امور نے زیارت گروپ آرگنائزرز (ZGOs) کو بھی ہدایت کی ہے کہ وہ اپنے گروپس میں شامل پاکستانی زائرین کو بارڈر کی بندش سے فوری طور پر آگاہ کریں۔ ترجمان نے زائرین پر زور دیا ہے کہ سفر شروع کرنے سے قبل اپنے متعلقہ زیارت گروپ آرگنائزرز سے سفری صورتحال کی تصدیق ضرور کریں تاکہ کسی قسم کی پریشانی سے بچا جاسکے۔