پاکستان تحریک انصاف کے بانی عمران خان اور ان کی اہلیہ بشریٰ بی بی کی صحت سے متعلق اسلام آباد ہائیکورٹ میں اہم تفصیلات سامنے آئی ہیں۔
عمران خان کے وکیل بیرسٹر سلمان صفدر نے عدالت کو بتایا کہ ان کے مؤکل کا بلڈ پریشر قابو میں نہیں آ رہا، جس کے باعث برین ہیمرج کا خطرہ ہو سکتا ہے، جبکہ بشریٰ بی بی کی آنکھوں کی حالت بھی تشویش ناک ہے۔
اسلام آباد ہائیکورٹ میں 190 ملین پاؤنڈ کیس میں دونوں کی سزاؤں کے خلاف اپیلوں کی سماعت چیف جسٹس سرفراز ڈوگر اور جسٹس محمد آصف پر مشتمل دو رکنی بینچ نے کی۔ سماعت کے دوران وکلا کی جیل ملاقاتوں، طبی سہولیات اور اپیلوں پر دلائل کی تیاری کے معاملات زیر بحث آئے۔
بیرسٹر سلمان صفدر نے عدالت کو آگاہ کیا کہ عمران خان کی آنکھوں کی حالت میں کچھ بہتری آئی ہے، تاہم بلڈ پریشر کا مسئلہ برقرار ہے۔ دوسری جانب بشریٰ بی بی کی آنکھ میں زخم موجود ہے اور 15 نومبر کو ان کا دوبارہ آپریشن متوقع ہے۔ وکیل نے مؤقف اختیار کیا کہ جیل میں ان کا مناسب علاج ممکن نہیں، اس لیے انہیں طبی بنیادوں پر ضمانت دی جائے اور صحت کا جائزہ لینے کے لیے میڈیکل بورڈ بنایا جائے۔
تاہم ایڈووکیٹ جنرل اسلام آباد نے ان خدشات کے جواب میں بتایا کہ حکومت دونوں قیدیوں کی صحت سے متعلق اپنی ذمہ داریاں پوری کر رہی ہے۔ ان کے مطابق بشریٰ بی بی کا 8 نومبر کو بھی میڈیکل بورڈ نے معائنہ کیا تھا اور انہیں جیل میں ضروری طبی سہولیات فراہم کی جا رہی ہیں۔
سماعت کے دوران وکیل لطیف کھوسہ نے شکایت کی کہ عدالتی احکامات کے باوجود ان کی عمران خان اور بشریٰ بی بی سے ملاقات نہیں کرائی گئی۔ اس پر عدالت نے متعلقہ حکام کو ہدایت کی کہ ملاقات میں حائل رکاوٹیں دور کی جائیں اور وکلا کو اپنے مؤکلین سے قانونی مشاورت کا موقع دیا جائے۔
سلمان صفدر نے مزید بتایا کہ ان کی عمران خان سے سات ماہ اور بشریٰ بی بی سے گیارہ ماہ بعد ملاقات ہوئی ہے، جس کے بعد انہیں اپیلوں پر دلائل دینے کی ہدایات ملی ہیں۔ انہوں نے مقدمے کی تیاری کے لیے مزید وقت مانگا، تاہم نیب پراسیکیوٹر نے اس درخواست پر اعتراض کیا۔
عدالت نے ریمارکس دیے کہ اپیلوں کو دائر ہوئے ایک سال سے زیادہ عرصہ گزر چکا ہے اور اب حتمی دلائل شروع ہونا ضروری ہیں۔ تاہم وکلا کو مناسب تیاری کا موقع بھی دیا جائے گا۔
سماعت کے اختتام پر اسلام آباد ہائیکورٹ نے سردار لطیف کھوسہ کی عمران خان اور بشریٰ بی بی سے کم از کم ایک گھنٹے کی جیل ملاقات کرانے کا حکم دیا۔ عدالت نے ہدایت کی کہ ملاقات جلد کرائی جائے تاکہ آئندہ ہفتے سے اپیلوں پر باقاعدہ دلائل کا آغاز ہو سکے۔
واضح رہے کہ عمران خان کے بلڈ پریشر اور برین ہیمرج کے خطرے سے متعلق خدشات ان کے وکیل نے عدالت میں پیش کیے ہیں، جبکہ سرکاری حکام کا مؤقف ہے کہ قیدیوں کو ضروری طبی سہولیات فراہم کی جا رہی ہیں۔