وزیراعظم کے مشیر رانا ثنا اللہ نے نجی ٹی وی چینل کے پروگرام میں گفتگو کرتے ہوئے کہا ہے کہ صوبوں کے معاملے پر اگر ریفرنڈم کا انعقاد ہو بھی جائے تب بھی حتمی فیصلہ پارلیمنٹ ہی نے کرنا ہے۔
انہوں نے واضح کیا کہ ریفرنڈم کرانے کا اختیار پارلیمنٹ کے پاس ہے اور تاحال یہ معاملہ ایوان میں پیش نہیں ہوا، تاہم جب یہ معاملہ پارلیمنٹ میں آئے گا تو اس پر باقاعدہ پالیسی بیان جاری کیا جائے گا اور تفصیلی بحث ہوگی۔
بانی پی ٹی آئی عمران خان سے ملاقاتوں کے حوالے سے رانا ثنا اللہ کا کہنا تھا کہ ان کے دونوں وکلا نے ان سے ملاقات کی ہے، جس کے بعد وکلا کی جانب سے کی جانے والی سیاسی گفتگو آئندہ ملاقاتوں کی راہ میں رکاوٹ بن سکتی ہے۔
انہوں نے مزید کہا کہ تحریک انصاف نے لانگ مارچ کی کال دی ہوئی تھی جس پر انہیں سمجھانے کی کوشش کی گئی اور ہر ممکن یقین دہانی کرائی گئی۔
مشیر وزیراعظم کے مطابق ماضی میں ملاقاتوں پر پابندی اس لیے عائد کی گئی تھی کیونکہ ان ملاقاتوں کو سیاسی مقاصد کے لیے استعمال کیا جاتا رہا ہے، جبکہ اب ان کے آئندہ کے لائحہ عمل کا علم آنے والے دنوں میں ہوگا۔