انڈر 19 ایشیا کپ کے فائنل میں پاکستان کے خلاف ایک وکٹ سے سنسنی خیز کامیابی کے بعد بھارتی کھلاڑیوں کے جارحانہ جشن، گالی گلوچ اور نامناسب اشاروں پر کرکٹ حلقوں کی جانب سے شدید تنقید کی جا رہی ہے۔
میچ کے اختتام پر بھارتی انڈر 19 ٹیم کے کھلاڑیوں نے فتح کا جشن مناتے ہوئے آپے سے باہر ہو کر نامناسب رویہ اختیار کیا اور بالخصوص بھارت کے خلاف لیگ میچ میں سنچری اسکور کرنے والے پاکستانی وکٹ کیپر حمزہ ظہور کے سامنے آ کر نازیبا اشارے کیے۔
اس دوران بھارتی ٹیم کے سپورٹ اسٹاف کو میدان میں آ کر اپنے کھلاڑیوں کو روکنے اور صورتحال کو قابو میں لانے کی کوشش کرتے ہوئے بھی دیکھا گیا۔
اس واقعے کی ویڈیوز سامنے آنے کے بعد خود بھارتی میڈیا نے بھی اپنے کھلاڑیوں کے طرزِ عمل کو جارحانہ قرار دیتے ہوئے اسے رپورٹ کیا ہے اور نامناسب اشاروں پر سوالات اٹھائے ہیں۔
دوسری جانب سوشل میڈیا صارفین نے بھی بھارتی کرکٹرز کے رویے کو آڑے ہاتھوں لیتے ہوئے اسے اسپورٹس مین اسپرٹ اور کھیل کے اخلاقی تقاضوں کے منافی قرار دیا ہے اور سوال اٹھایا ہے کہ فتح کی خوشی میں کھیل کے احترام اور اخلاقیات کو کیوں نظرانداز کیا گیا۔