کمنز نے کہا، ’عثمان میرے دوست ہیں، لیکن دوست ایک دوسرے کی زندگی اور ساکھ کے معاملے میں غیر سنجیدہ یا لاپرواہ نہیں ہو سکتے۔‘
آسٹریلیا کے کپتان پیٹ کمنز نے ’سینڈ پیپر سکینڈل‘ (ریگ مال کے ذریعے گیند سے چھیڑ چھاڑ کے واقعے) کے حوالے سے عثمان خواجہ کے دعوؤں پر شدید ردِعمل دیتے ہوئے اسے سو فیصد غلط اور ’سراسر بے بنیاد‘ قرار دیا ہے۔
جمعے کو سڈنی میں طویل نیوز کانفرنس کرتے ہوئے پیٹ کمنز نے کہا کہ ’جب وہ (عثمان خواجہ) کہتے ہیں کہ ہم سب جانتے تھے، تو اگر ان کا مطلب یہ ہے کہ ہمیں معلوم تھا کہ میدان میں ریگ مال لے جایا جا رہا ہے، تو وہ سو فیصد غلط ہیں۔‘
’میں گذشتہ آٹھ سالوں سے مسلسل یہی کہتا آ رہا ہوں۔ مجھے علم نہیں تھا کہ ایسا کچھ ہو رہا ہے۔‘
عثمان خواجہ نے رواں ہفتے شائع ہونے والی اپنی کتاب میں لکھا تھا کہ پوری آسٹریلوی ٹیم جس میں کمنز بھی شامل تھے۔ اس 'سینڈ پیپر' (ریگ مال) والے منصوبے سے واقف تھی اور انھیں اس کی ذمہ داری قبول کرنی چاہیے تھی۔
خیال رہے کہ 2018 میں جنوبی افریقہ کے خلاف کیپ ٹاؤن ٹیسٹ کے دوران آسٹریلیا کی بال ٹیمپرنگ سکینڈل نے عالمی کرکٹ میں ہلچل مچا دی تھی۔
ٹی وی کیمروں نے فیلڈر کیمرون بینکرافٹ کو ایک زرد شے سے گیند پر رگڑ لگاتے ہوئے پکڑا، جس کے بعد بینکرافٹ اور کپتان سٹیو سمتھ نے گیند کی حالت تبدیل کرنے کی کوشش کا اعتراف کیا۔
بعد ازاں یہ سامنے آیا کہ اس مقصد کے لیے سینڈ پیپر استعمال کیا گیا تھا، جس پر شدید عوامی اور سیاسی ردعمل دیکھنے میں آیا اور اس معاملے نے آسٹریلوی کرکٹ کو بحران سے دوچار کر دیا۔
اس سکینڈل کے نتیجے میں سٹیو سمتھ کو کپتانی سے ہٹا دیا گیا جبکہ نائب کپتان ڈیوڈ وارنر بھی اپنی قیادت کی ذمہ داریوں سے محروم ہو گئے۔ سمتھ، وارنر اور بینکرافٹ تینوں کو طویل پابندیوں کا سامنا کرنا پڑا۔
اس وقت کے آسٹریلوی وزیراعظم نے بھی اس واقعے پر شدید مایوسی کا اظہار کیا، جبکہ ہیڈ کوچ ڈیرن لیہمن کو اگرچہ منصوبے سے لاعلم قرار دیا گیا، تاہم انھوں نے بھی بعد ازاں اپنے عہدے سے استعفیٰ دے دیا تھا۔
کمنز اور خواجہ نے جنوری میں خواجہ کی بین الاقوامی کرکٹ سے ریٹائرمنٹ تک، ایک ساتھ 56 ٹیسٹ میچ کھیلے۔
جب کمنز نے 2011 میں اپنے ٹیسٹ کیریئر کا آغاز کیا تو خواجہ اس وقت آسٹریلوی ٹیم کا حصہ تھے؛ اس کے علاوہ، یہ دونوں ڈومیسٹک کرکٹ میں ’نیو ساؤتھ ویلز‘ کی جانب سے بھی ایک ساتھ کھیل چکے ہیں۔
کمنز نے کہا، ’عثمان میرے دوست ہیں، لیکن دوست ایک دوسرے کی زندگی اور ساکھ کے معاملے میں غیر سنجیدہ یا لاپرواہ نہیں ہو سکتے۔‘
’اُنھوں (عثمان خواجہ) نے اپنی کتاب میں میری زندگی، دیگر کئی لوگوں کی زندگیوں، اور میرے خیال میں، آسٹریلوی کرکٹ کے حوالے سے بھی غیر سنجیدہ رویہ اپنایا ہے۔‘
’میں مکمل طور پر اس بات کی حمایت کرتا ہوں کہ وہ اپنی کہانی بیان کریں۔۔۔مجھے خوشی ہے کہ وہ ایسا کرنے کی ہمت رکھتے ہیں۔۔۔لیکن ہم جو کچھ کہتے یا کرتے ہیں، ہمیں اس کے لیے جوابدہ بھی ہونا چاہیے۔‘
ڈیوڈ وارنر کی عثمان خواجہ کی حمایت
اس سے قبل سابق آسٹریلو اوپنر ڈیوڈ وارنر نے عثمان خواجہ کے بیان کی حمایت کرتے ہوئے انسٹا گرام پر ایک ویڈیو بیان میں کہا تھا کہ واقعے کے بعد کرکٹ آسٹریلیا کی جانب سے کی جانے والی تحقیقات کا عمل ’جلد بازی میں اور ناقص انداز میں‘ انجام دیا گیا تھا۔
سابق اوپنر عثمان خواجہ نے اپنی سوانح عمری ’صبر‘ اور اخبار سڈنی مارننگ ہیرالڈ کو دیے گئے ایک انٹرویو میں دعویٰ کیا تھا کہ آٹھ سال قبل جنوبی افریقہ کے خلاف تیسرے ٹیسٹ میں گیند پر سینڈ پیپر استعمال کرنے کے منصوبے کی ذمہ داری پوری ٹیم کو قبول کرنی چاہیے۔
عثمان خواجہ نے دعویٰ کیا تھا کہ سینڈ پیپر کے استعمال کے بارے میں پوری آسٹریلوی ٹیم کو علم تھا، حالانکہ بولرز مسلسل اس منصوبے سے لاعلمی کا اظہار کرتے رہے ہیں۔
عثمان خواجہ اپنے ان انکشافات کے بعد آسٹریلوی اور عالمی میڈیا میں بحث کا موضوع بنے ہوئے ہیں 2024 میں بین الاقوامی کرکٹ سے ریٹائر ہونے والے وارنر نے انسٹا گرام پر ایک ویڈیو بیان میں کہا: ’اس موضوع پر بات کیے ہوئے مجھے آٹھ سال ہو گئے ہیں۔ اور عثمان، میں آپ کی مکمل حمایت کرتا ہوں۔‘
وارنر نے عثمان خواجہ کو مخاطب کرتے ہوئے کہا کہ ’میں آپ کا شکر گزار ہوں کہ آپ نے یہ کیا۔ آپ نے جو کچھ کہا ہے وہ سو فیصد درست ہے۔ اب سب کو سچائی کا پتا چل گیا ہے۔‘
وارنر کا کہنا تھا کہ ’یہ عثمان کی کہانی ہے۔ یہ وہی ہے جس پر عثمان یقین رکھتے ہیں۔ اُسی نے اُس دن پیش آنے والی ہر ایک بات کو تحریر کر لیا تھا۔‘
’یہ پورا انٹرویو اور تحقیقاتی عمل جلد بازی میں اور ناقص انداز میں انجام دیا گیا تھا۔ اُسی (عثمان خواجہ) کیمرون بینکرافٹ کے بالکل ساتھ بیٹھے ہوئے تھے، لیکن اُن کا انٹرویو ہی نہیں لیا گیا۔‘
وارنر نے تحقیقات پر سوال اُٹھاتے ہوئے کہا کہ ’یہ مکمل اور جامع تحقیقات کیسے ہو سکتی ہیں؟ یہ بات میری سمجھ سے باہر ہے۔ ہم یہاں کسی پر الزام تراشی کرنے نہیں آئے اور نہ ہی پرانے زخم کرید رہے ہیں۔ بات دراصل جوابدہی، شفافیت اور اس بات کو یقینی بنانے کی ہے کہ سچائی کا درست اور مکمل طور پر جائزہ لیا جائے۔‘
’کسی کھلاڑی کو قربانی کا بکرا نہیں بنایا گیا‘
اس سے قبل عثمان خواجہ کا کہنا تھا کہ 2018 کے سینڈ پیپر سکینڈل کے حوالے سے ان کے انکشافات کے ذریعے ’کسی کھلاڑی کو قربانی کا بکرا نہیں بنایا گیا۔‘
اس وقت صرف کپتان سٹیو سمتھ، نائب کپتان ڈیوڈ وارنر اور اوپنر کیمرون بینکرافٹ کو سزا دی گئی تھی۔
اتوار کو انسٹاگرام پر اپنی بات کی وضاحت کے لیے پوسٹ کی گئی ویڈیوز میں خواجہ نے کہا کہ ’آپ نے دیکھا ہو گا کہ جب میں نے کہا کہ ہم سب ملوث تھے تو اس کا مطلب یہ ہے کہ چاہے ہمیں پسند ہو یا نہ ہو، جو کچھ ہوا اس کے لیے ہم سب مشترکہ طور پر ذمہ دار ہیں۔‘
’بطور ٹیم ہمیں اجتماعی طور پر اس کی ذمہ داری قبول کرنی چاہیے۔ بس اتنی ہی بات ہے۔‘
عثمان خواجہ اپنے ان انکشافات کے بعد آسٹریلوی اور عالمی میڈیا میں بحث کا موضوع بنے ہوئے ہیں۔
تاہم وہ کہتے ہیں کہ ’اب جبکہ سب بات کر رہے ہیں، تو کیا میں اس بات سے انکار کروں گا کہ سب جانتے تھے؟ نہیں، میں اس سے بھی انکار نہیں کروں گا۔ کِلک بیٹ میڈیا کی سرخیاں آپ کو کچھ بھی کہنا چاہیں مگر میں اپنی کتاب میں کبھی کسی اور کی طرف سے بات نہیں کر رہا۔‘
اس وقت صرف کپتان سٹیو سمتھ، نائب کپتان ڈیوڈ وارنر اور اوپنر کیمرون بینکرافٹ کو سزا دی گئی تھیعثمان خواجہ کے بیان پر تنقید
کیپ ٹاؤن تنازع میں ملوث دیگر کھلاڑی بار بار یہ کہہ چکے ہیں کہ انھیں گیند کی حالت تبدیل کرنے کے لیے سینڈ پیپر رگڑنے کے منصوبے کے بارے میں کوئی علم نہیں تھا۔
اس ٹیسٹ میں آسٹریلیا کی جانب سے کھیلنے والے چار بولرز پیٹ کمنز، مچل سٹارک، جوش ہیزل ووڈ اور نیتھن لیون، اب بھی ٹیم کا حصہ ہیں۔ کمنز 2021 سے ٹیسٹ کپتان ہیں۔
2021 میں ان چاروں نے ایک مشترکہ بیان جاری کیا تھا جس میں کہا گیا تھا کہ انھیں ’اس بات کا علم نہیں تھا کہ کوئی بیرونی چیز میدان میں لائی گئی تھی۔‘
سنیچر کو ڈیرن لیمن، جنھوں نے بال ٹیمپرنگ سکینڈل کے بعد آسٹریلیا کے کوچ کے عہدے سے استعفیٰ دیا تھا، نے بھی اے بی سی سے گفتگو میں خواجہ کے دعوؤں کی تردید کرتے ہوئے کہا کہ ’مجھے نہیں لگتا کہ سب جانتے ہوں گے۔‘
خواجہ نے جنوری میں بین الاقوامی کرکٹ سے ریٹائرمنٹ لی تھی۔
انھوں نے آسٹریلیا کے لیے 88 ٹیسٹ میچوں میں 6,229 رنز بنائے۔
اکتوبر میں یہ انکشاف ہوا تھا کہ خواجہ نے اپنی آنے والی سوانح عمری کے مندرجات پر بات کرنے کے لیے کمنز سے ملاقات کی تھی۔
یہ ملاقات جنوبی افریقہ میں آسٹریلیا کی حالیہ ٹیسٹ سیریز سے قبل ہوئی تھی، جسے پروٹیز نے دو، ایک سے جیت لیا تھا۔
سابق آسٹریلوی ٹیسٹ کپتان مارک ٹیلر نے کہا کہ وہ اس معاملے پر ’مایوس‘ ہیں۔ ٹیلر نے کہا کہ ’اس واقعے کو آٹھ سال ہو چکے ہیں۔۔۔ آپ امید کرتے ہیں کہ یہ معاملہ ختم ہو جائے گا۔‘
ٹیلر نے کہا کہ ’مجھے نہیں معلوم کہ یہ معاملہ یہاں سے کہاں جائے گا۔ یہ کتاب کی فروخت اور میڈیا کے لیے تو بہت اچھا ہے، لیکن کرکٹ کے کھیل کے لیے مایوس کن ہے۔‘
خواجہ نے وضاحت کی کہ اس منصوبے کی ذمہ داری صرف سمتھ، وارنر اور بینکرافٹ پر عائد نہیں ہوتی بلکہ پورے نظام پر عائد ہونی چاہیے تھیعثمان خواجہ کا اپنی کتاب کا دفاع
انسٹاگرام پر ایک ویڈیوز میں 39 سالہ خواجہ نے وضاحت کی کہ اس منصوبے کی ذمہ داری صرف سمتھ، وارنر اور بینکرافٹ پر عائد نہیں ہوتی بلکہ پورے نظام پر عائد ہونی چاہیے تھی۔
خواجہ نے کہا کہ ’میں نے (جنوبی افریقہ) سیریز ختم ہونے تک انتظار کیا۔ اور آپ جانتے ہیں کیا؟ میں نے کسی کو قربانی کا بکرا نہیں بنایا۔
’جو کھلاڑی اس وقت ٹیم میں ہیں اور جو دیگر لوگ جنوبی افریقہ کے دورے پر تھے، جن میں میں بھی شامل ہوں، ہم متاثرہ فریق نہیں ہیں۔
’تینوں کھلاڑیوں (سمتھ، وارنر اور بینکرافٹ) نے ہم سب کی جانب سے ذمہ داری اپنے سر لی۔ متاثرہ فریق وہ ہیں۔ ہاں، یہ ہم سب کے لیے مشکل تھا، میرے لیے بھی۔ میں نے بھی بے خوابی کی راتیں گزاری ہیں۔‘
خواجہ نے اس بات کا بھی دفاع کیا کہ انھوں نے اس وقت یا 2021 میں بولرز کے بیان کے بعد سینڈ پیپر معاملے پر اپنا مؤقف ظاہر نہیں کیا اور اس کے بجائے اپنی سوانح عمری کا انتظار کیا۔
انھوں نے کہا کہ ’آپ پوچھتے ہیں کہ میں نے اس کے بعد چار برسوں تک، جب میں ابھی کھیل رہا تھا، کچھ کیوں نہیں کہا؟ آپ جانتے ہیں کیا؟ میں کبھی پہلا شخص نہیں بننا چاہتا تھا جو اس بارے میں بات کرے۔
’آپ مجھے بزدل کہیں یا جو چاہیں کہیں، مجھے نہیں معلوم تھا کہ یہ کیسے کروں کیونکہ میں ابھی ٹیم میں تھا۔ جب مجھے معلوم تھا کہ میرے کچھ ساتھی اس موضوع پر بات نہیں کرنا چاہتے تو میں یہ معاملہ کیسے اٹھاتا؟‘
کرکٹ آسٹریلیا نے ابھی تک یہ اشارہ نہیں دیا کہ وہ 2018 میں نیولینڈز میں پیش آنے والے واقعات کی تحقیقات دوبارہ کھولنا چاہتا ہے۔
گورننگ باڈی کے ایک بیان میں کہا گیا ہے کہ ’2018 کے کیپ ٹاؤن ٹیسٹ کے بعد گزرنے والے آٹھ برسوں میں بہت زیادہ قیاس آرائیاں کی گئیں، جن میں گذشتہ ماہ جنوبی افریقہ میں ہونے والی سیریز کے دوران وسیع میڈیا کوریج بھی شامل ہے۔
’اس عرصے میں کسی بھی متعلقہ معلومات کو پیش کرنے کے مسلسل مواقع موجود رہے ہیں، اور یہ صورتحال اب بھی برقرار ہے۔ اب تک کرکٹ آسٹریلیا کو فراہم کی جانے والی تمام متعلقہ معلومات پر مناسب غور کیا گیا ہے اور ہمیں اپنے عمل کے نتائج پر اب بھی اطمینان ہے۔‘
BBC World Service کی نئی ایپ ڈاؤن لوڈ کریں۔
'BBC News اردو' ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں۔
نوٹ: نئی ایپ برطانیہ اور امریکہ میں دستیاب نہیں ہے اور اس کا انگریزی زبان میں ایڈیشن موجود نہیں۔
