بچپن میں ہم سب کے ساتھ ایسا ہوا ہوگا کہ اسکول میں پینسل گم یا چوری ہو جاتی تھیں یا پھر کسی دوست کو دے دیتے تھے،لیکن ہمارا ردعمل صرف اتنا ہوتا تھا کہ ہم نئی پینسل خرید لیا کرتے تھے۔ مگر ایک وائرل ویڈیو میں دیکھا جاسکتا ہے کہ پرائمری کلاس کا بچہ پینسل واپس نہ ملنے پر پولیس اسٹیشن پہنچ گیا۔
بھارتی ریاست آندھرا پردیش کے ایک ضلع میں موجود پولیس اہلکار اس وقت حیران رہ گئے، جب پرائمری کلاس میں پڑھنے والا بچہ اپنے ہم جماعت بچے کیخلاف مقدمہ درج کروانے پولیس اسٹیشن پہنچ گیا۔
آندھرا پردیش پولیس کی جانب سے جاری ہونے والی ویڈیو میں دیکھا جاسکتا ہے کہ بچہ پولیس والوں کو کہہ رہا ہے کہ اس کے کلاس فیلو نے پینسل لی تھی مگر واپس نہیں کی، جبکہ ویڈیو میں بچے کے ساتھ موجود دوست پیچھے کھڑے ہنس رہے ہیں۔
بعدازاں پولیس والوں نے دونوں بچوں میں صلح کروادی، تاہم پولیس کا کہنا تھا کہ یہ ایک مثبت عمل ہے کہ بچوں کو پولیس پر اعتماد ہے کہ وہ ان کی مشکل کا حل تلاش کرسکتے ہیں۔