پرتگال کے سپر اسٹار فٹبالر کرسٹیانو رونالڈو نے رونے والے ننھے ایرانی مداح سے ملاقات کا خواب پورا کرتے ہوئے خوبصورت تحفہ بھی دیا۔
عالمی شہرت یافتہ فٹبالر کرسٹیانو رونالڈو گزشتہ روز ایران پہنچے تھے، اپنے دورے کے دوران انہوں نے ننھے ایرانی فین کا خواب پورا کرتے ہوئے اس سے خصوصی ملاقات کی۔
ایرانی دارالحکومت تہران پہنچنے پر رونالڈو کا پرتپاک استقبال کیا گیا، ہزاروں مداح ان کی ایک جھلک دیکھنے کے لیے ایئرپورٹ پر جمع ہونے کے ساتھ ہوٹل روانگی کے وقت بھی دیوانہ وار بس کے ساتھ دوڑتے رہے۔
ایران میں کئی بڑے بڑے پرستاروں کو اپنے ہیرو سے ملاقات کا موقع نہ مل سکا لیکن ایک چھوٹے سے فین نے رونالڈو سے ملاقات کی اور ان سے تحفہ بھی پایا۔
تہران کے اسپیناس پیلس ہوٹل میں ایڈریان نامی کمسن پرستار بھی موجود تھا جو اپنے ہیرو کو نہ دیکھنے پر زار وقطار رونے لگا اور اس کی یوں پھوٹ پھوٹ کر رونے کی ویڈیو سوشل میڈیا پر وائرل ہوگئی۔
کرسٹیانو رونالڈو اور سعودی فٹبال کلب النصر کو ایڈریان والہانہ محبت اور جذبات میں آکر رونے کا پتہ چلا تو النصر کے عہدیداروں نے ننھے مداح کی خواہش پوری کرنے کے لیے اس کی ہوٹل میں اپنے ہیرو سے ملاقات کرانے کا فیصلہ کیا جس کے بعد بچے کو ہوٹل میں رونالڈ کے کمرے میں لے جایا گیا۔
اسٹار فٹبالر نے ایڈریان کو ایک شرٹ بھی تحفے میں دی۔ اس ملاقات کی ویڈیو بھی سوشل میڈیا پر وائرل ہوگئی جس کو مداحوں نے بہت پسند کیا ہے۔