استنبول۔17فروری (اے پی پی):ترکیہ کے وزیر خزانہ مہمت شمشیک نے کہا کہ ان کا ملک سعودی عرب کو سیاحتی اہداف کے حصول میں مدد فراہم کر سکتا ہے۔
ترک خبررساں ادارے ٹی آر ٹی کے مطابق استنبول میں ترکیہ سعودی عرب سرمایہ کاری اور کاروباری فورم کے دوران شمشیک نے صحافیوں سے گفتگو کرتے ہوئے بتایا کہ ترکیہ تعمیراتی شعبے میں وسیع پیمانے کے تجربات رکھتا ہے اور وہ سعودی عرب کے شعبہ سیاحت کے فروغ میں معاونت کر سکتا ہے ۔انہوں نے کہا کہ ہم وہاں کی تنصیبات کی تعمیرات اور ان کے انتظامی امور میں خدمات فراہم کر سکتے ہیں اور ہماری سیاحتی ایجنسیاں وہاں سیاحوں کو لانے میں معاونت بھی کر سکتی ہیں۔وزیرخارجہ نے اس بات پر زور دیا کہ ترکیہ شعبہ سیاحت میں دنیا کے پانچویں نمبر پر ہے۔ انہوں نے کہا کہ ہمارے 2023 کے اعداد و شمار واضح ہیں۔ جب عالمی اعداد و شمار واضح ہو جائیں گے تو ہم ممکنہ طور پر تیسرے یا چوتھے نمبر پر ہوں گے۔ ترکیہ کے پاس اس حوالے سے اہم تجربات ہیں۔