وفاقی وزیرِ قانون اعظم نذیر تارڑ نے کہا ہے کہ مخصوص نشستوں پر سپریم کورٹ کے فیصلے سے حکومت کو کوئی خطرہ نہیں ہے۔
جمعے کو فیصلہ آنے کے بعد اسلام آباد میں پریس کانفرنس سے خطاب میں اعظم نذیر تارڑ نے کہا کہ فیصلے کے مطابق نشستیں پی ٹی آئی کو مل جانے کے بعد بھی حکومت 209 اراکین کی اکثریت رکھتی ہے۔
وزیر قانون نے کہا کہ مخصوص نشستیں سنی اتحاد کونسل کو ملنی چاہیے تھیں کیونکہ پی ٹی آئی تو فریق ہی نہیں تھی۔
ان کے مطابق ’سنی اتحاد کونسل ریلیف لینے آئی تھی اس کو یکسر سائیڈ پر کر دیا گیا، جبکہ پی ٹی آئی کیس میں درخواست گزار تھی اور نہ ہی اس کی جانب سے ریلیف مانگا گیا تھا۔‘
عدالتی فیصلے کے حوالے سے انہوں نے کہا کہ ’ابھی تو شارٹ آرڈر دیکھا ہے، تفصیلی فیصلہ آنے پر مزید رائے دوں گا۔‘
تاہم انہوں نے اتنا ضرور کہا کہ ’فیصلے نے پیچیدگی اور سوالات کو جنم دیا ہے اور ایسی صورت حال پیدا ہوئی ہے جو واضح نہیں ہے۔‘