لاہور میں بڑھتی ہوئی اسموگ کے پیش نظر ضلعی انتظامیہ نے اہم اقدامات اٹھاتے ہوئے بیرونی سرگرمیوں پر پابندی عائد کر دی اور اس حوالے سے باضابطہ نوٹیفکیشن جاری کردیا۔ اسموگ پر قابو پانے کی کوششوں میں انوائرنمنٹ پروٹیکشن ایجنسی متحرک ہے اور خلاف ورزی پر پنجاب انوائرنمنٹل پروٹیکشن ایکٹ 1997 کے تحت کارروائی عمل میں لائی جائے گی۔
نوٹیفکیشن کے مطابق، 11 نومبر سے ہر قسم کی بیرونی سرگرمیاں بند رہیں گی، جن میں کھیلوں کے مقابلے، نمائشیں، تقریبات اور ریسٹورنٹس کی ڈائننگ شامل ہیں۔ مارکیٹس، دکانیں، اور شاپنگ مالز رات 8 بجے بند کر دیے جائیں گے، جبکہ میڈیکل اسٹورز، لیبارٹریز، پٹرول پمپس اور کریانہ اسٹورز ان پابندیوں سے مستثنیٰ ہوں گے۔ بڑے ڈپارٹمنٹل اسٹورز میں صرف گروسری اور میڈیکل سیکشنز کھلے رہیں گے۔
احکامات کی خلاف ورزی پر دفعہ 188 کے تحت قانونی کارروائی کی جائے گی، اور یہ پابندیاں 11 نومبر سے 17 نومبر تک نافذ العمل رہیں گی۔
ڈپٹی کمشنر لاہور نے شہریوں سے اپیل کی ہے کہ اسموگ کے دوران محتاط رہیں، غیر ضروری باہر نہ نکلیں اور ماسک کا استعمال یقینی بنائیں۔ فضائی آلودگی کے اس سنگین مسئلے سے نمٹنے کیلئے اجتماعی احتیاطی تدابیر اختیار کرنا ضروری ہے۔