بالی وڈ کے معروف اداکار اور شیو سینا کے رہنما گووندا کی ایک انتخابی ریلی کے دوران طبیعت اچانک خراب ہوگئی، جس کے باعث انہیں فوری طور پر ائیر لفٹ کر کے ممبئی کے اسپتال منتقل کیا گیا۔
بھارتی میڈیا کے مطابق جَلگاؤں میں منعقدہ اس ریلی میں گووندا نے ابتدائی طور پر ہلکی جسمانی تکلیف کی شکایت کی، مگر جلد ہی معاملہ سنگین ہوگیا۔ سینے میں شدید درد اور ٹانگوں میں تکلیف کی وجہ سے ڈاکٹروں کے مشورے پر فوری کارروائی کرتے ہوئے انہیں ممبئی منتقل کیا گیا، جہاں ان کی طبیعت کو دیکھتے ہوئے فوری امداد فراہم کی گئی۔
فی الحال گووندا یا ان کے خاندان کی طرف سے ان کی صحت کے حوالے سے کوئی بیان جاری نہیں کیا گیا، جس کی وجہ سے ان کے مداح شدید تشویش میں مبتلا ہیں۔
قابل ذکر بات یہ ہے کہ اس سے قبل بھی گووندا ایک حادثے کا شکار ہوئے تھے۔ پچھلے ماہ اپنی رہائش گاہ پر وہ اپنے لائسنس یافتہ ریوالور کو الماری میں رکھتے ہوئے حادثاتی طور پر گولی لگنے سے زخمی ہوگئے تھے۔ ان کے مینیجر نے بتایا کہ گولی غلطی سے فائر ہوگئی تھی، جس سے گووندا کی ایک ٹانگ پر چوٹ لگی، تاہم ان کا زخم خطرناک نہیں تھا اور وہ اسپتال سے جلد ڈسچارج ہوگئے تھے۔
گووندا کے حالیہ واقعات نے ان کے مداحوں کو فکرمند کر دیا ہے، مگر سب دعاگو ہیں کہ وہ جلد صحتیاب ہو کر دوبارہ اپنی سرگرمیاں بحال کریں۔