بھارتی ریاست مدھیہ پردیش کے شہر اندور میں شادی کی ایک خوشی بھرے موقع پر اچانک ایسا منظر دیکھنے کو ملا جو نہ صرف حیران کن بلکہ افسوسناک بھی تھا۔ واقعہ بنگنگا کے علاقے کا ہے جہاں شادی کی تقریب میں دولہے ہیمنت کیتھواس کی آمد کے ساتھ ہی اچانک بجلی چلی گئی۔
دلہن کے گھر والوں نے روشنی بحال کرنے کی فوری کوشش کی لیکن اندھیرے نے ماحول کشیدہ کر دیا۔ باراتیوں نے پہلے بلند آوازوں میں شکایتیں شروع کیں، بات تلخیوں تک پہنچی اور پھر دولہے سمیت باراتی ہاتھا پائی پر اتر آئے۔
دلہن نے پولیس کو بتایا، "سب کچھ اچھا جا رہا تھا، مہمانوں کا استقبال کیا گیا، کھانا پیش کیا گیا۔ لیکن جیسے ہی لائٹ گئی، دولہے اور اس کے گھر والوں نے سب کچھ بھول کر ہم پر چڑھائی کر دی۔ تلخ کلامی ہوئی، مجھے مارا اور پھر سب کچھ توڑ پھوڑ کر بارات واپس لے گئے۔"
پولیس کے مطابق دلہن کی شکایت پر دولہے ہیمنت کیتھواس سمیت دیگر باراتیوں کے خلاف مقدمہ درج کر لیا گیا ہے اور واقعے کی تفتیش جاری ہے۔ شادی اب ختم ہو چکی ہے، اور بارات روشنی کے بغیر واپس لوٹ گئی — نہ دلہن ساتھ گئی، نہ خوشی کا چراغ جل سکا۔