بھارتی ایئرلائن انڈیگو کی دہلی سے سری نگر جانے والی پرواز اُس وقت خطرناک صورتحال سے دوچار ہو گئی جب شدید ژالہ باری نے طیارے کو اپنی لپیٹ میں لے لیا۔ 227 مسافروں کو لے کر اُڑنے والی فلائٹ 6E2142 اپنی منزل کے قریب پہنچ چکی تھی کہ اچانک خراب موسم نے اس کا راستہ روک لیا۔
بدھ کی شام، جب طیارہ مقبوضہ کشمیر کی فضائی حدود میں داخل ہوا، تو اچانک آسمان پر گرجتی بجلی اور تیز ژالہ باری نے عملے اور مسافروں دونوں کو ہلا کر رکھ دیا۔ طیارے کے اگلے حصے کو واضح نقصان پہنچا، جس کے باعث پائلٹ نے فوری طور پر ایئر ٹریفک کنٹرول سے رابطہ کر کے ہنگامی لینڈنگ کی اجازت طلب کی۔ خوش قسمتی سے، شام 6:30 بجے کے قریب طیارے کو سری نگر ایئرپورٹ پر محفوظ انداز میں اتار لیا گیا۔
اس واقعے کی ایک ویڈیو، جو جہاز میں موجود ایک مسافر نے ریکارڈ کی، سوشل میڈیا پر تیزی سے وائرل ہو گئی ہے۔ ویڈیو میں طیارے کے اندر کے مناظر دکھائے گئے ہیں جہاں خوفزدہ مسافر جھٹکوں کے دوران ایک دوسرے کو تسلی دینے کی کوشش کر رہے تھے۔ ہر جھٹکے کے ساتھ کیبن میں پریشانی، گھبراہٹ اور آہوں کی آوازیں گونجتی رہیں۔
لینڈنگ کے بعد طیارے میں سوار تمام مسافروں اور عملے کو باحفاظت باہر نکال لیا گیا، تاہم جہاز کو شدید نقصان پہنچ چکا تھا۔ انڈیگو انتظامیہ نے اس ایئرکرافٹ کو “AOG” یعنی “ایئرکرافٹ آن گراؤنڈ” قرار دیتے ہوئے عارضی طور پر سروس سے ہٹا دیا ہے۔