پاکستان کی قومی مینز والی بال ٹیم نے بحرین میں جاری اے وی سی نیشنز کپ 2025 کے فائنل کے لیے کوالیفائی کر لیا ہے۔
پاکستان نے اپنی شاندار کارکردگی کا سلسلہ جاری رکھتے ہوئے سیمی فائنل میں قطر کو تین صفر (0-3) سے شکست دی۔
یہ میچ پیر کے روز عیسیٰ سپورٹس سٹی ہال میں کھیلا گیا۔
یہ سیمی فائنل گزشتہ سال کے اے وی سی چیلنج کپ فائنل کا ری میچ تھا، جس میں قطر نے پاکستان کو شکست دے کر ٹائٹل اپنے نام کیا تھا۔
تاہم اس بار گرین شرٹس نے عمدہ کارکردگی دکھاتے ہوئے پہلا سیٹ 25-22 سے جیتا، جس میں جارحانہ حملے نمایاں رہے۔
دوسرے سیٹ میں دونوں ٹیموں کے درمیان سخت مقابلہ دیکھنے کو ملا، مگر پاکستان نے ایک بار پھر 25-22 سے فتح حاصل کی۔
تیسرے اور فیصلہ کن سیٹ میں پاکستان نے 25-21 سے کامیابی حاصل کر کے سیمی فائنل میں فتح سمیٹی۔
پاکستان کی جانب سے عثمان فریاد علی اور مراد خان نمایاں کھلاڑی رہے جنہوں نے حملے میں کلیدی کردار ادا کیا۔
اس سے قبل کوارٹر فائنل میں پاکستان نے انڈونیشیا کو 3-1 سے شکست دی تھی، حالانکہ ابتدائی سیٹ 20-25 سے ہارنے کے بعد ٹیم نے شاندار واپسی کرتے ہوئے اگلے تین سیٹ 25-21، 25-20 اور 25-17 سے جیتے۔
گروپ مرحلے میں پاکستان نے چائنیز تائپے اور فلپائن کو شکست دے کر ٹورنامنٹ کے اگلے مرحلے میں رسائی حاصل کی تھی۔
نیشنز کپ کا فائنل کل کھیلا جائے گا، جس میں پاکستان کا مقابلہ کوریا اور میزبان بحرین کے درمیان سیمی فائنل کے فاتح سے ہوگا۔