غصے میں منہ پر بال مار دی۔۔ کرکٹ کی دنیا کے 10 خطرناک جھگڑے جنہیں لوگ آج تک بھول نہیں سکے

ماضی میں کرکٹ جنٹلمین گیم کہا جاتا تھا جہاں کھلاڑی مہذب انداز میں کھیلتے اور شائقین بھی بہت مہذبانہ طریقے سے میچ دیکھتے تھے لیکن وقت کے ساتھ ساتھ اس کھیل میں جوں جوں تبدیلیاں آتی گئیں ویسے ویسے کھلاڑی جارحانہ رویہ اپناتے گئے اور شائقین بھی پرجوش ہوتے چلے گئے۔ گزشتہ روز پاکستان اور افغانستان کے درمیان میچ میں پاکستانی بلے باز آصف علی اور افغان بولر فرید احمد کے درمیان لڑائی نے ایک بار پھر کرکٹ کے میدان میں ہونیوالے جھگڑوں کی یادیں تازہ کردی ہیں۔

10۔ مچل اسٹارک/کیرون پولارڈ

ویسٹ انڈین آل راؤنڈر کیرون پولارڈ اپنے جارحانہ کھیل کی وجہ سے مشہور ہیں اور اکثر مخالف کھلاڑیوں سے الجھتے بھی دکھائی دیتے ہیں۔ انڈین پریمئر لیگ کے ایک میچ میں آسٹریلوی فاسٹ باؤلر مچل اسٹارک اور کیرون پولارڈ کے درمیان جھگڑے میں پولارڈ نے اسٹارک کی طرف بلا پھینکا تاہم خوش قسمتی سے وہ انہیں نہیں لگا۔

9۔ شاہد آفریدی/گوتم گمبھیر

پاکستان کے اسٹار آل راؤنڈر شاہد آفریدی ویسے تو جارحانہ کھیل کی وجہ سے مشہور ہوئے لیکن شائقین انہیں ہمیشہ ہنستا مسکراتا دیکھتے ہیں- تاہم بھارت کے خلاف ایک میچ میں گوتم گمبھیر کے ساتھ جھگڑے کو شائقین آج تک بھول نہیں پائے۔

8۔ شین وارن/مارلون سیموئیل

آسٹریلوی ٹیم کے سابق لیگ اسپنر شین وارن اپنی گیند بازی کے ساتھ ساتھ تنازعات کیلئے بھی مشہور رہے ہیں، بگ بیش لیگ میں ویسٹ انڈین کھلاڑی مارلون سیموئیل نے ڈیوڈ ہسی سے مذاق کیا جس پر شین وارن غصہ میں آگئے اور مارلون سیموئیل سے تلخ کلامی کی اور بعد میں گیند سیموئیل کے منہ پر دے ماری اور جواب میں سیموئیل نے بھی اپنا بلا شین وارن کی طرف پھینکا جو انہیں لگ نہیں سکا۔

7۔ برمودہ کے میچ میں لڑائی

برمودہ میں ہونے والے ایک ڈومیسٹک میچ میں 2 کھلاڑیوں سے شروع ہوکر پوری ٹیموں کے درمیان ہونیوالی یہ لڑائی بھی کرکٹ کی تاریخ کا حصہ ہے، جیسن اینڈریسن اور جورج برائن کے درمیان ہونیوالی لڑائی کا آغاز وکٹ کیپر اور بلے باز کی جھڑپ سے ہوا جس میں بعد میں دیگر کھلاڑی بھی کود پڑے اور شائقین کو کرکٹ کے میدان میں ریسلنگ بھی دیکھنے کو مل گئی۔

6۔ جاوید میانداد/کرن مورے

پاکستان کرکٹ ٹیم کے کپتان جاوید میانداد اپنے کھیل کے ساتھ ساتھ اپنی شرارتوں اور دلچسپ حرکتوں کیلئے بھی مشہور رہے ہیں۔ بھارت کیخلاف 1992 کے ورلڈ کپ میں بھارتی وکٹ کیپر کرن مورے اور جاوید میانداد کے درمیان کھچاؤ دیکھا گیا اور اس میچ میں جاوید میانداد نے جس دلچسپ انداز میں کرن مورے سے بدلہ لیا وہ آج بھی لوگ یاد کرکے ہنس پڑتے ہیں۔

5۔ کامران اکمل/ایشانت شرما

پاک بھارت مقابلہ ہو اور کھلاڑیوں میں تلخی نہ ہو ایسا ناممکن ہے، 2012 میں ہونے والے ایک مقابلے میں بھارتی پیسر ایشانت شرما اور پاکستانی بلے باز کامران اکمل کے درمیان شدید تلخ کلامی ہوئی اور بات ہاتھا پائی تک پہنچ گئی تھی لیکن امپائر اور بھارتی کھلاڑیوں کی مداخلت سے معاملہ زیادہ خراب نہیں ہوا۔

4۔ احمد شہزاد/تلکارتنے دلشان

پاکستان کے اوپنر احمد شہزاد اور سری لنکن کھلاڑی تلکارتنے دلشان کے درمیان ایک ٹی ٹوئنٹی میچ میں دونوں کے درمیان تو تو میں میں ہاتھا پائی تک پہنچ گئی لیکن شاہد آفریدی نے معاملے کو بگڑنے سے پہلے سنبھال لیا۔

3۔ ہربھجن سنگھ/سری شانت

آئی پی ایل کے ایک میچ میں 2008 میں ممبئی انڈینز کے ہربھجن سنگھ نے کنگز الیون پنجاب کے سری شانت کو دوران میچ تھپڑ جڑ دیا اور فاسٹ باؤلر سری شانت میدان میں زار و قطار روتے نظر آئے جس پر ہربھجن سنگھ کو شدید تنقید کا سامنا کرنا پڑا۔

2۔ شعیب اختر/ہربھجن سنگھ

2010 ایشیا کپ میں پاک بھارت میچ میں شعیب اختر کی گیند پر چھکا مارنے کے بعد ہر بھجن سنگھ شعیب اختر کو اکساتے ہیں جس کے بعد شعیب دو لگاتار باؤنسرز سے ہربھجن کو جواب دیتے ہیں اور یہ معاملہ تلخ کلامی سے ہوتا ہوا جھگڑے میں بدلنے سے پہلے ہی دیگر کھلاڑی اور امپائر سنبھال لیتے ہیں۔

1۔ آصف علی/فرید احمد

پاکستان اور افغانستان کے درمیان ایشیا کپ کے میں پاکستانی بلے باز آصف علی فرید احمد کو ایک زور دار چھکا لگانے کے بعد انہی کی گیند پر کیچ آؤٹ ہوگئے اور افغان کھلاڑیوں نے توہین آمیز رویہ اختیار کیا اور فرید احمد نے آصف علی کو نازیبا کلمات ادا کئے پر آصف علی بھی طیش میں آگئے اور نوبت ہاتھا پائی تک آتے آتے رہ گئی اور افغان کھلاڑیوں کے اس رویئے کا بدلہ نسیم شاہ نے پاکستان کو فتح سے ہمکنار کروا کر لے لیا۔