سرفراز احمد سپاٹ فکسنگ کیس٬ پیشکش کرنے والے پر دس سال کی پابندی

4261 views

انٹرنیشنل کرکٹ کونسل نے پاکستانی کرکٹ ٹیم کے کپتان سرفراز احمد کو سپاٹ فکسنگ کی پیشکش کرنے کا الزام ثابت ہونے پر عرفان انصاری نامی شخص پر دس برس کی پابندی عائد کر دی ہے۔

عرفان انصاری پر الزام تھا کہ انھوں نے اکتوبر 2017 میں متحدہ عرب امارات میں پاکستان اور سری لنکا کے درمیان کھیلی گئی ون ڈے سیریز کے دوران پاکستانی کرکٹ ٹیم کے کپتان سرفراز احمد کو مبینہ طور پر سپاٹ فکسنگ کی پیشکش کی تھی۔

آئی سی سی کی جانب سے بدھ کو جاری کردہ بیان میں کہا گیا ہے کہ انٹرنیشنل کرکٹ کونسل کے انسدادِ بدعنوانی ٹربیونل نے انھیں ضابطۂ اخلاق کی تین شقوں کی خلاف ورزی کا مرتکب پایا۔

بیان کے مطابق اس معاملے کی سماعت کے دوران ٹربیونل کو ٹھوس ثبوت ملے کہ عرفان انصاری کی سرفراز سے ملاقات کا مقصد ان سے معلومات کا حصول تھا۔

خیال رہے کہ سرفراز احمد نے اس بارے میں پاکستانی ٹیم کی منیجمنٹ اور اینٹی کرپشن یونٹ کو فوری طور پر مطلع کر دیا تھا جس کے بعد تحقیقات شروع کی گئی تھیں۔

بیان میں کہا گیا ہے کہ عرفان انصاری پر آئی سی سی کے ضابطۂ اخلاق کا اطلاق ان کے پاکستانی کرکٹ ٹیم سے رابطوں اور متحدہ عرب امارات میں دو کرکٹ ٹیموں کے کوچ ہونے کے ناتے ہوتا ہے۔

نامہ نگار عبدالرشید شکور کے مطابق عرفان انصاری پچھلے کئی برسوں سے متحدہ عرب امارات میں مقیم ہیں اور وہاں مختلف کرکٹ اکیڈمیز میں کوچنگ کے علاوہ وہاں جانے والی غیرملکی ٹیموں کو پریکٹس کے لیے بولرز مہیا کرنے میں بھی مدد دیتے رہے ہیں۔

ان پر گزشتہ برس فردِ جرم عائد کی گئی تھی اور انٹرنیشنل کرکٹ کونسل نے عرفان انصاری پر اینٹی کرپشن کے ضابطہ اخلاق کی جن تین شقوں کی خلاف ورزی کا الزام لگایا تھا ان کا تعلق براہ راست پیشکش کرنے اور ترغیب دینے سے ہے۔


Partner Content: BBC URDU

Comments
YOU MAY ALSO LIKE:

Written byNews Desk

Hamariweb's editorial desk covering news, guides and explainers on everyday life in Pakistan.

Irfan Ansari has been banned from all cricket for 10 years after the ICC Anti-Corruption Tribunal found him guilty of breaching three counts of the ICC Anti-Corruption Code, an ICC press release said. During the hearing, the Tribunal heard evidence that Ansari approached Pakistan captain Sarfaraz Ahmed during the Pakistan series with Sri Lanka in the UAE in October 2017 with a view to engaging him in corrupt conduct by soliciting information from him.