پلاسٹک کی تھیلیوں سے تیار کردہ انوکھا لباس

آپ نے دنیا بھر میں مختلف قسم کے مہنگے اور نفیس لباس دیکھیں ہوں گے لیکن آج ہم ایسے لباس کی بات کریں گے جسے نارتھ کیرولینا کی ایک 75 سالہ خاتون نے پلاسٹک کی 300 تھیلیوں سے تیار کیا ہے اور اسے دیکھ کر بڑے سے بڑے ماہرین بھی دنگ رہ گئے ہیں ۔
 

75 سالہ روسا نے تھیلیوں سے جیکٹ بناکر ری سائیکلنگ کی ایک نئی مثال قائم کی ہے ۔ دو ماہ کی محنت سے 300 پلاسٹک شاپنگ بیگ سے بنا یہ سوٹ تیار ہوا ہے ۔ تھیلیوں سے تیار کردہ یہ سوٹ دیکھنے میں ایسا لگتا ہے کہ جیسے اسے دھاگوں سے بنایا گیا ہو ۔

روسا کم عمر سے ہی اپنے خاندان کی کفالت کے لیے سلائی کا کام کیا کرتی تھیں جو ان کا شوق بھی تھا اور وہ اب تک متعدد کپڑے سی چکی ہیں۔

شاپنگ بیگز سے بنے اس سوٹ کے لیے روسا کی جانب سے باقاعدہ مرحلے طے کیے گئے ہیں پہلے مرحلے میں روسا نے پلاسٹک کی تھیلیوں کو پتلے ٹکڑوں میں کاٹا اور انہیں دھاگا نما شکل دی۔ اگلے مرحلے میں تھیلیوں سے بنے دھاگوں کے لیے ایک عدد خاص سوئی کی ضرورت تھی جو نہ ملنے کی صورت میں روسا نے خود بنائی اور اپنے کام کا آغاز کیا۔

ایک سال قبل اس نے ایک خاتون کے پاس پلاسٹک کی تھیلیوں سے بنا ایک پرس دیکھا جو اسے اور اس کی بیٹیوں کو بہت پسند آیا۔ گھر آکر روسا نے پرس کو بنانے کا طریقہ یوٹیوب پر سرچ کیا اور آخرکار تھیلیوں کی مدد سے رنگ برنگا پرس تیار کرلیا ۔
 

جس کے بعد روسا کو تھیلیوں کی مدد سے لباس تیار کرنے کا خیال آیا اور دو ماہ میں تھیلیوں سے بنا سوٹ تیار بھی کرلیا اور انہوں نے اس لباس کو ایک شادی کی تقریب میں زیب تن بھی کیا اور لوگوں کی توجہ کا مرکز بن گئیں۔ ماہرین اس لباس کو فیشن نہیں آرٹ کا نام دیا ہے۔