کمر درد سے نجات چاہتے ہیں تو چند غذائی عادات تبدیل کریں

آپ چاہے ملازمت کے دوران گھنٹوں بیٹھے رہیں یا پھر سخت ورزش کریں اس سب کے دوران اکثر لوگوں کو کمر درد کا سامنا کرنا پڑتا ہے جو کہ مذاق نہیں ہے- کمر درد کی تکلیف روزمرہ کی زندگی کے معاملات کو بری طرح متاثر کرتی ہے٬ یہاں تک کہ آپ مختلف دوائیں کھا کر عارضی سکون حاصل کرتے ہیں-
 

لیکن اگر آپ اس درد سے مکمل نجات حاصل کرنا چاہتے ہیں تو آپ کو اپنی غذائی عادات پر غور کرنا چاہیے- آپ کی غذائی عادات اگر آپ کی بہترین دوست بن سکتی ہیں تو یہ آپ کی بدترین دشمن بھی بن سکتی ہیں-

کمر درد کی عام وجہ سوزش ہوتی ہے اور بہت سے کھانے ایسے ہوتے ہیں جو اس سوزش میں اضافہ کرتی ہیں جبکہ متعدد غذائیں ایسی بھی ہیں جو اس سوزش کو کم کرنے میں اہم کردار ادا کرتی ہیں-

اس لیے یہ اہم ہے کہ آپ اپنی خوراک میں ایسی غذائیں شامل کریں جو سوزش کم کرتی ہیں اور تب ہی آپ کمر درد سے نجات حاصل کرسکتے ہیں-

پھل٬ سبزیاں٬ گری دار میوے٬ زیتون کا تیل اور مچھلی ایسی غذائیں ہیں جو سوزش کو کم کرسکتی ہیں اور آپ انہیں روزانہ اپنی خوراک کا حصہ بنا کر کمر درد کا مقابلہ کرسکتے ہیں- دوسری جانب تلی ہوئی چیزیں٬ سوڈا اور تیار شدہ کھانے ایسی غذائیں ہیں جو سوزش میں مزید اضافہ کرسکتی ہیں-
 

اس کے علاوہ کیلشیم سے بھرپور غذا استعمال کرنے سے بھی آپ کمر درد کو روک سکتے ہیں- کیلشیم پر مشتمل غذائیں کمر درد کو کم کرنے میں اہم کردار ادا کرتی ہیں- لہٰذا اس بات کو یقینی بنائیں کہ آپ کی روزمرہ خوراک میں کیلشیم سے بھرپور غذائیں جیسے کہ پنیر٬ دودھ اور دہی وغیرہ بھی شامل ہو-

کھانے کی مخصوص عادات جیسے کھانا چھوڑنا٬ بہت زیادہ کھانا یا روزانہ ایک جیسی غذا کھانا بھی جسم پر دباؤ بڑھانے کا سبب بنتی ہیں- بظاہر یہ عادات نقصان دہ معلوم نہیں ہوتیں لیکن درحقیت یہ عضلاتی تناؤ کا سبب بنتی ہیں اور ان کا براہ راست نشانہ نہ صرف کمر ہوتی ہے بلکہ دوسرے جسمانی اعضا میں بھی درد پیدا ہوتا ہے-

آپ کے لیے بہتر ہے کہ اعتدال میں رہ کر کھائیں اور متوازن غذائیں کھائیں- یاد رکھیں غذا میں تبدیلیاں یکدم بڑے پیمانے پر نہ کریں بلکہ آہستہ آہستہ کریں- تیزی سے تبدیلی بھی جسم کو نقصان پہنچا سکتی ہے-
 

کھانے کی عادات کے علاوہ چند مزید ایسی غذائیں بھی ہیں جو جسم پر دباؤ بڑھاتی ہیں جیسے کہ اضافی کیفین٬ چینی یا الکوحل کا استعمال وغیرہ- کمر درد سے نمٹنے کے دوران اس قسم کی غذاؤں کو بھی کنٹرول میں رکھیں-

غذا ہمارے کمر درد پر گہرے اثرات مرتب کرتی ہے اس لیے ضروری ہے کہ اگر ہم اس سے بچنا چاہتے ہیں تو اپنی غذائی عادات پر غور کریں- غذا ہمارے جسم کے لیے اہم ہے اس لیے ہمیں بہترین غذائیں کھا کر فائدہ اٹھانا چاہیے اور بیمار کردینے والی غذاؤں کے استعمال سے گریز کرنا چاہیے-