’قصور کے بچوں کا کیا قصور ہے؟‘

گزشتہ برس آٹھ سالہ بچی زینب کے ریپ اور قتل کے بعد پاکستانی پنجاب کا ضلع قصور ایک مرتبہ پھر خبروں میں ہے۔ قصور میں تین بچوں کی لاشیں ملیں، جن کے بارے میں پولیس کو شبہ ہے کہ انہیں ریپ کے بعد قتل کیا گیا۔
 

پاکستانی سوشل میڈیا پر ایک مرتبہ پھر ہیش ٹیگ قصور ٹرینڈ کر رہا ہے۔ گزشتہ روز ضلع قصور کی تحصیل چونیاں میں ایک ویران جگہ سے پولیس کو تین بچوں کی لاشیں ملیں۔

مقامی میڈیا میں شائع ہونے والی رپورٹوں کے مطابق پولیس کا کہنا ہے کہ چونیاں میں دو بچوں کی گمشدگی کی رپورٹس ایک ماہ قبل درج کی گئی تھیں جب کہ تیسرا بچہ دو روز قبل لاپتہ ہوا تھا۔

پولیس نے فیضان نامی ایک آٹھ سالہ بچے کی شناخت کر لی ہے جب کہ دیگر دو بچوں کی لاشیں مسخ ہو جانے کے باعث ان کی شناخت کے لیے ڈی این اے ٹیسٹ کرایا جا رہا ہے۔

پنجاب کے اسی ضلع میں ایک مرتبہ پھر بچوں کے ممکنہ ریپ اور قتل کی خبریں سامنے آنے کے بعد سوشل میڈیا پر ایک مرتبہ پھر ان واقعات کی شدید مذمت کی جا رہی ہے۔

زینب کے قتل کے واقعے کے بعد اس وقت پنجاب میں شہباز شریف وزیر اعلیٰ تھے اور سوشل میڈیا پر انہیں شدید تنقید کا نشانہ بنایا گیا تھا۔ اب ان تازہ واقعات کے بعد پنجاب حکومت پر بھی تنقید کی جا رہی ہے اور معاشرتی رویوں پر بھی۔

بلال ناصر نامی ایک صارف نے لکھا، ''میں کہتا رہا کہ قصور واقعے کا کوئی سیاسی رنگ نہیں ہے یہ ہمارے معاشرے کے زوال کی نشانی ہے، تربیت کی ضرورت ہے۔‘‘
 

میں کہتا رہا کہ قصور واقعے کا کوئی سیاسی رنگ نہیں ہے یہ ہمارے معاشرے کی زوال کی نشانی ہے تربیت کی ضرورت ہے پوری ریسرچ ہونی چائیے کہ اس علاقے کا ٹرینڈ کیا ہے ان کا psychological analysis ہو لیکن بےشرمو کی طرح شہبازشریف کو قصوروار ٹہرایا گیا اب تو شہباز نہیں ہے؟ اب کیا؟

— Faisal Ranjha (@ranjha001) September 17, 2019

صحافی عارف حمید بھٹی کا کہنا تھا، ''جب تک کرپٹ، سفارشی اور نااہل افسر تعینات ہوتے رہیں گے، غریب، بے بس اور بے گناہوں کے ساتھ ظلم ہوتا رہے گا۔‘‘
 

قصور میں معصوم جانوں کا ضیاع درد ناک خبر ہے۔جب تک کرپٹ ،سفارتی اور نا اہل افسر تعینات ہوتے رہیں گے۔ غریب ،بےبس اور بے گناہوں کے ساتھ ظلم ہوتا رہے گا۔
حقائق سے چشم پوشی نا انصافی میں اضافے کا باعث بنتی ہے۔#kasur

— Arif Hameed Bhatti (@arifhameed15) September 17, 2019

سیاست دان اور صحافی عامر لیاقت حسین نے اپنی ایک ٹوئیٹ میں پوچھا، ''قصور میں بچوں کا کیا قصور؟‘‘
 

بس
مجھے کوئی اتنا بتا دے
زیادہ کچھ نہیں پوچھتا
کسی حاکم سے سوالی نہیں
یہ اپنی ذات سے سوال ہے
ظلم کی ہر رات سے سوا ل ہے
کہ
“قصورمیں بچوں کا کیا قصور؟”##Kasur

— Aamir Liaquat Husain (@AamirLiaquat) September 17, 2019

پنجاب کے وزیر اعلیٰ عثمان بزدار کے ٹوئٹر ہینڈل پر جاری کیے گیے پیغام میں لکھا گیا کہ ان کی حکومت نے 'آتے ہی ضلع قصور میں خصوصی طور پر سیف سٹی پراجیکٹ شروع کرایا تھا، جس کا ڈیٹا حاصل کیا جا رہا ہے‘۔
 

پتوکی میں پیش آنے والے افسوسناک واقعہ پر میں مسلسل IG پنجاب سے رابطے میں ہوں
ایڈیشنل IG موقع پر موجود ہیں اور سپیشل برانچ، فرانزک لیبارٹری سمیت ایجنسیوں کی خدمات بھی حاصل کی جا رہی ہیں

ہم نے آتے ہی ضلع قصور میں خصوصی طور پر سیف سٹی پراجیکٹ شروع کروایا جس کاڈیٹا حاصل کیاجارہا ہے

— Usman Buzdar (@UsmanAKBuzdar) September 17, 2019