موسم سرما کی بیماریوں سے بچاؤ کی تدابیر

موسم سرما جب بھی آتا ہے اپنے ساتھ رنگ ہی رنگ لاتا ہے اس موسم میں برف کے خوبصورت گالے روئی کی طرح جب زمین پر گرتے ہیں تو درخت ،پہاڑ اور زمین پر سفید چادر سی بچھ جاتی ہے اس موسم میں دن سمٹ جاتے ہیں اور راتیں ٹھنڈی سیاہ اور طویل ہو جاتی ہیں-

لیکن اس سرد موسم کی شدت سے بچے، بوڑھے اور خواتین زیادہ متاثر ہوتی ہیں اس لئے ان کا بہت زیادہ خیال رکھنے کی ضرورت ہے اس موسم میں نزلہ و زکام عام بیماری ہے اس کے علاوہ بچوں کو سینے اور گلے کے امراض لاحق ہوتے ہیں کھانسی اور نمونیہ بھی اس موسم کی بیماریاں ہیں-
 

اگر ہم موسم سرما کے آغاز سے پہلے اس سے بچنے کی تدابیر کر لیں تو ہم ان بیماریوں سے محفوظ رہ سکتے ہیں۔سردی سے بچاؤ کے لئے گرم کپڑوں کا استعمال کریں گیس کے ہیٹر کا استعمال ہرگز نہ کریں کیونکہ اس سے نکلنے والی گیس مضر صحت ہے ۔

موسم سرما میں ایسی غذاؤں کا استعمال کریں جو آپ کو سردی سے محفوظ رکھیں اور آپ کی صحت کے لئے بھی فائدہ مند ہوں جیسے مچھلی،انڈہ،گاجر کاحلوہ،دیسی مرغ کی یخنی،گڑ ،تل اور میوہ جات کا استعمال آپ کو سردی سے محفوظ رکھتا ہے-

اس موسم میں تلی ہوئی اشیاء سے پرہیز رکھیں جیسے سموسے ،پکوڑے اور حلوہ پڑی وغیرہ ہیں ذائقے کے لئے کبھی کبھار ان کا استعمال کیا جا سکتا ہے لیکن زیادہ استعمال مضر صحت ہے۔ مچھلی کا استعمال روزانہ کریں اگر قوت خرید نہ ہو تو ہفتہ میں ایک یا دو بار ضرور استعمال کریں۔ مچھلی چھوٹے بچوں ،خواتین اور مردوں کے لئے برابر فوائد کی حامل ہے اس کے استعمال سے یادداشت بہتر اور دماغ تیز ہوتا ہے شوگر کے مرض سے محفوظ رکھتی ہے بالوں کو گرنے سے بچاتی ہے۔
 

سردیوں میں گاجر ،چقندر اور مالٹے کے جوس کا استعمال بھی آپ کی صحت کے لئے مفید ہے ان کے استعمال سے آپ کا چہرہ اور جلد نہ صرف خوبصورت بلکہ رنگت بھی گوری ہو جاتی ہے۔ سردیوں میں بچوں کو شہد کا استعمال ضرور کروائیں اس سے وہ سینے اور گلے کے امراض سے محفوظ رہیں گے-

نیم گرم پانی میں شہد ملا کر پینے سے فاسد مادے اور جسم میں بڑھی ہوئی چربی کم ہو جاتی ہے جس سے آپ کا موٹاپا اور وزن کم ہو جاتا ہے وزن کم کرنے کے لئے نیم گرم پانی ،شہد اور ایک لیموں کا رس ملا کر نہار منہ لیں۔

سردیوں میں ہی ہونٹ ،ہاتھ پاؤں اور ایڑیاں پھٹ جاتی ہیں اس کے لئے ویسلین کا استعمال کریں پھٹی ایڑیوں کے لئے ہومیو پیتھک دوا کیلنڈولا کا استعمال کریں یا پھر ویسلین میں بیس قطرے پٹرولیم مدر ٹنکچر کے ڈال کر اچھی طرح مکس کریں رات کو سوتے وقت ہاتھ پاؤں اور منہ پر لگا کر سو جائیں اور صبح کسی اچھے صابن سے اپنا منہ دھو لیں۔