سردی کے موسم میں صبح جلدی اٹھنے اور بچوں کو اٹھانے کے آسان ٹوٹکے

سردی اور کمبل کا چولی دامن کا ساتھ ہوتا ہے اس موسم میں کمبل کو جتنا چھوڑیں وہ اتنا ہی کمبل ہو جاتا ہے۔ اسی وجہ سے اسکول جاتے بچے ، دفتر جاتے افراد لیٹ ہو جاتے ہیں کیوں کہ ان میں سے کوئی بھی اپنا نرم اور گرم بستر چھوڑنے پر آمادہ نہیں ہوتا۔ آج ہم آّپ کو سردی کے موسم میں بستر چھوڑنے کے کچھ آسان ٹوٹکے بتائيں گے جن کے استعمال سے آپ کی سردی دور بھاگ جائے گی اور آپ فوری طور پر بستر چھوڑ دیں گے

سونے سے پہلے تھوڑا پانی پی لیں
سونے سے قبل ایک گلاس پانی پی لینا بھی جلد جاگ جانے کا ایک بہترین نسخہ ہے- کیوں کہ سردی کی وجہ سے آپ کو پیشاب کرنے کی حاجت ہو گی اور ایک بار جاگنے کے بعد دوبارہ سونا مشکل ہوتا ہے اس وجہ سے یہ ایک قدرتی الارم ہے جو آپ کو جگانے کا باعث بنے گا-

الارم بستر سے دور رکھیں
مقررہ وقت جاگنے کے لیے الارم بستر سے دور لگائيں اس کا فائدہ یہ ہو گا کہ جب الارم بجے گا تو اس کی آواز آپ کو نیند سے بیدار کرے گی اور اس کو بند کرنے کے لیے آپ کو لامحالہ بستر چھوڑنا پڑے گا جس سے آنکھ کھل جاۓ گی-

کھڑکی کے پردے کھلے چھوڑ دیں
رات کو سونے سے قبل اس بات کا خاص طور پر اہتمام کریں کہ کھڑکی کے پردے کھلے ہوئے ہیں- اس کا فائدہ یہ ہو گا کہ جب صبح کی پہلی کرن نکلے گی تو اس کی روشنی کمرے میں پھیل جائے گی جو کہ آنکھ کھلنے کا باعث بنے گی-

سوئٹر بستر کے قریب رکھیں
سونے سے قبل سوئٹر اتارتے ہوئے اس کو بستر کے قریب ہی رکھیں تاکہ جیسے ہی آنکھ کھلے اسی وقت کمبل کو چھوڑتے ہوئے سوئٹر پہن لیں جس سے جسم گرم ہو جائے گا اور کمبل چھوڑنے کا زیادہ دکھ بھی نہ ہو گا-

بچوں کو جلدی جگانے کا طریقہ
بچوں کو گرم بستر سے نکالنا اور اسکول کے لیے تیار کرنا بھی ایک مشکل مرحلہ ہوتا ہے- اس کے لیے سب سے پہلے اس بات کا اہتمام کریں کہ وہ رات میں جلد سو جائيں تاکہ ان کی نیند پوری ہو جائے- اس کے بعد ان کو جگانے کے لیے ان کے سامنے کوئی دلچسپ مشفلہ رکھیں جیسے ان کا پسندیدہ کارٹون وغیرہ جس کو دیکھنے کے لیے وہ بیدار ہونا پسند کریں- ان کے کمبل کو سمیٹ کر اس کی جگہ ان کو سوئٹر پہنا دیں اور اس کے ساتھ منہ دھلا کر کچھ گرم کھانے کو دیں جس سے ان کے اندر گرمی آجائے گی اور ان کو جاگنے پر کوئی اعتراض بھی نہ ہوگا-