تمہارے برتن الگ کردیئے ہیں۔۔۔اپنے نوکروں سے بات کرنے کے چند اصول

ہمارے معاشرے کا المیہ یہ ہے کہ یہاں انسان طبقات میں بٹا ہوا ہے اور اس طبقے کے حساب سے ہی اس کو عزت اور اہمیت دی جاتی ہے۔۔۔ہمارے یہاں نوکروں کے ساتھ ہمیشہ ایک خاص قسم کا رویہ روا رکھا جاتا ہے جو انتہائی ہتک آمیز اور حقیرانہ ہے۔۔۔زیادہ تر گھروں میں نوکروں کے لئے گھر کے برتن نا صرف الگ ہوتے ہیں بلکہ ان کو ہمیشہ کونے میں بٹھا کر کھانا کھلا یاجا تا ہے۔۔۔جب سب مہمان چلے جائیں تو ہی انہیں صفائی کے بعد کھانا کھانے کی اجازت ہوتی ہے۔۔۔ان کی اجرت سے کہیں زیادہ کام لینے کے باوجود انہیں دو بول پیار کے نہیں ملتے۔۔۔اپنے گھر کے نوکروں کے سامنے اگر آپ ان باتوں کا خیال رکھیں گی تو گھر کا ماحول بھی ٹھیک رہے گا اور دل میں کوئی بات بھی نہیں آئے گی-

برتن سب کے الگ الگ کردیں
نوکروں کے ہی نہیں بلکہ گھر کے ہر فرد کے برتن الگ کردیں۔۔۔کیونکہ اگر آپ کے دل میں وہم ہے تو آپ اسے اس طرح سے ظاہر کریں کہ وہ اصول گھر کے ہر فرد کے لئے ہو نا کہ صرف نوکروں کے لئے۔۔۔آپ نیل پالش سے پلیٹ پر ، گلاس اور چمچوں پر رنگ لگادیں اور اپنا ، اپنے شوہر اور بچوں کا رنگ انہیں بتادیں اور یہی آپ نوکر کے ساتھ کریں کہ اس کو اپنا رنگ پتہ ہو۔۔۔
 

پیسوں کا ذکر نہیں کریں
یہ وہ طبقہ ہے جو زندگی کے کئی مسائل کو طوفان کی طرح اپنے اندر سمیٹ رہا ہوتا ہے اور ان کے سامنے اگر آپ نے اپنے گھر کے خرچوں اور پیسوں کا ہر وقت ذکر کیا تو وہ آپ کو رشک کی نگاہ سے دیکھیں گے اور یہ چیز ان کے ایمان کا امتحان بھی بن سکتی ہے۔۔۔انہیں اپنی خواہشات سے آگاہ نا کریں یا کم سے کم ان کے سامنے اس کا اظہار نا کریں کیونکہ آپ کی ضروریات بھی ان کی خواہشات سے کہیں بڑھ کر ہیں

تعریف کرنا سیکھیں
ایک تعریف آپ کی سو شکایتوں کو مسکراہٹ میں بدل سکتی ہے۔۔۔خاص طور پر اگر یہ تعریف آپ دو لوگوں کے سامنے کردیں۔۔۔ایسا اکثر ہم اس لئے نہیں کرتے کہ کہیں یہ نوکر سر پر نا چڑھ جائیں۔۔۔لیکن ایسا کرنے سے وہ زیادہ محبت اور دلجمعی سے کام کریں گے۔۔۔کیونکہ تعریف انسان کے اندر ہمت اور محبت کے جذبات کو بڑھاتی ہے
 

اس کے لئے بھی شاپنگ کریں
اگر گھر کے لئے دس ہزار کی شاپنگ کی ہے تو اس میں ہزار روپے کا اضافہ اور کرلیں۔۔۔اس میں کوئی مضائقہ نہیں۔۔۔کہ کبھی کبھی ان کے لئے بھی سودے میں پھل اور سبزیاں آجائیں۔۔۔ضروری نہیں کہ نوکر کو رات کا بچا سالن ہی ملے۔۔۔کبھی کبھی اس کے لئے بھی سودا تازہ اور مناسب ہونا چاہئے۔۔۔ساتھ ہی اس کے لئے بھی اگر صابن اور شیمپو لے لئے جائیں تو وہ آپ کے گھرمیں صفائی کا پیغام لائے گا

نوکروں کو عزت دیں اور عزت کروائیں
نوکروں سے بھی اسی انداز میں بات کریں جیسے گھر کے دیگر لوگوں کو مخاطب کر کے کرتی ہں۔۔۔آواز میں بد لحاظی اور حقارت کو شامل نا ہونے دیں۔۔۔سلام کریں اور اس کی خیر خیریت پوچھیں۔۔۔اس کی مجبوریوں کو بھی انسانی مجبوریاں ہی سمجھیں۔۔۔اپنے بچوں کو اس کی اہمیت سے آگاہ کریں اور محبت سے بات کرنے کی تنبیہ کریں